Guðný og Berglind koma báðar inn í byrjunarliðið

Þorsteinn Halldórsson landsliðsþjálfari gerir tvær breytingar á byrjunarliði sínu frá því í 1-0 sigrinum á Wales á Laugardalsvelli á föstudaginn.

Þorsteinn tekur sóknarleikmennina Diljá Ýr Zomers og Amöndu Jacobsen Andradóttur út úr byrjunarlliðinu en í stað þeirra koma þær Guðný Árnadóttir og Berglind Rós Ágústsdóttir sem eru vanar því að spila mun aftar á vellinum.

Guðný og Berglind Rós komu einmitt inn á fyrir þær Diljá og Amöndu í seinni hálfleik í Wales leiknum, Guðný á 61. mínútu en Berglind á 74. mínútu.

Sveindís Jane Jónsdóttir getur ekki tekið þátt í leiknum vegna meiðsla og Sandra Sigurðardóttir, sem tók aftur fram skóna í sumar eftir að hafa hætt, er áfram á bekknum.

Telma Ívarsdóttir stóð sig vel á móti Wales og heldur stöðu sinni í markinu.

Leikurinn hefst klukkan 16:15 og verður í beinni textalýsingu á Vísi.