Erlent

For­sætis­ráð­herra Palestínu biðlar til al­þjóða­sam­fé­lagsins að stilla til friðar

Heimir Már Pétursson skrifar
Þessari stúlku var bjargað úr húsarústum eftir loftárás Ísraelshers á Jabaliya flóttamannabúðirnar í norðurhluta Gaza hinn 1. nóvember.
Þessari stúlku var bjargað úr húsarústum eftir loftárás Ísraelshers á Jabaliya flóttamannabúðirnar í norðurhluta Gaza hinn 1. nóvember. AP/Abed Khaled

Forsætisráðherra Palestínu biðlaði til alþjóðasamfélagsins í dag að þrýsta á endalok stríðsátaka á Gaza og spurði hversu margir þyrftu að deyja og hvað eyðileggingin þyrfti að verða mikil áður nóg væri komið. Alþingi samþykkti ályktun utanríkismálanefndar um átökin á Gaza í dag með öllum greiddum atkvæðum.

Hópur leiðtoga arabaríkja, vestrænna ríkja og samtaka komu saman til skyndifundar í boði Frakklandsforseta í París í dag til að ræða stöðuna í átökunum á Gaza. Mohammad Shtayyeh forsætisráðherra Palestínu spurði ráðstefnugesti hvenær þeir teldu að nóg væri komið af morðum og eyðileggingu heimila fólks

Mohammed Shtayyeh forsætisráðherra Palestínu (með aðsetur á Vesturbakkanum) segir Ísrael ekki í stríði við Hamas heldur alla palestínsku þjóðina.AP/Ludovic Marin

„Hvað þurfa margir Palestínumenn að deyja til að stöðva stríðið? Þegar sex börn eru myrt á hverri klukkustund, þegar kona er myrt á klukkustundarfresti, er það nóg? Eða þegar tíu þúsund manns hafa verið drepin á þrjátíu dögum, dugar það til,“ spurði forsætisráðherrann.

Sjálfsvörn gæfi ríkjum ekki rétt til að hernema önnur lönd, til að brjóta alþjóðleg mannúðarlög og hvorugur aðilinn hefði rétt til að myrða saklausa borgara.

„En Ísrael er ekki í stríði við Hamas heldur alla palestínsku þjóðina. Varnarmálaráðherra Ísraels hefur sagt að hann eigi í stríði við mannskepnur,“ sagði Shtayyeh.

Tveggja ríkja lausn er eina leiðin sem tryggir frið og öryggi

Emmanuel Macron forseti Frakklands sagði tveggja ríkja lausn sjálfstæðrar Palestínu og Ísraels þjóna öryggishagsmunum beggja aðila.

Emmanuel Macron forseti Frakklands vill blása nýju lífi í frumkvæði Óslóar samkomulagsins um tveggja ríkja lausn.AP/Ludovic Marin

„Við verðum að læra af reynslunni og hætta að fresta friði í Miðausturlöndum. Við verðum að ná aftur frumkvæðinu og safna styrk til að færa okkur loksins í átt til tveggja ríkja lausnarinnar, þar sem Ísrael og Palestína geta þrifist hlið við hlið í friði og öryggi,“ sagði Macron á ráðstefnunni í París.

En á meðan leiðtogar heimsins tala heldur stríðið áfram. Ísraelsher er kominn inn í miðborg Gazaborgar. Börn og fullorðnir halda áfram að deyja og innviðir eru sprengdir í loft upp með tilheyrandi skorti á mat, lyfjum, vatni og rafmagni.

Þúsundir Palestínumanna hafa flúið suður á bóginn frá Gazaborg vegna stöðugra loftárása Ísraelshers á borgina undanfarnar vikur.AP/Hatem Moussa

Á Alþingi Íslendinga náðist loks að samþykkja í dag ályktun með öllum greiddum atkvæðum, sem allir flokkar stóðu að, um vopnahlé og fordæmingu á árásum á almenna borgara og brot á alþjóðalögum.

Katrín Jakobsdóttir fagnaði því að Alþingi gæti lyft sér upp fyrir dægurþras og samþykkt ályktun um átökin á Gaza samhljóða.Vísir/Vilhelm

„Umræða dagsins í dag hefur sýnt svo ekki verður um villst að enginn í þessum sal er ósnortinn af þeim skelfilegu atburðum sem nú eiga sér stað fyrir botni Miðjarðarhafs. Ég tel að það sé gríðarlega mikilvægt að Alþingi geti hafið sig yfir pólitískt þjark hversdagsins og talað með skýrri röddu í atburðum þar sem fórnarlömbin eru fyrst og fremst venjulegt fólk, óbreyttir borgarar,“ sagði Katrín Jakobsdóttir forsætisráðherra þegar ályktunin var samþykkt í dag.

Átök í Ísrael og Palestínu Palestína Ísrael Frakkland Alþingi

Tengdar fréttir

Skora á íslensk stjórnvöld að bregðast við krísunni á Gasa

Íslenskir læknar og hjúkrunarfræðingar hafa sent íslenskum stjórnvöldum sitthvort opinbera bréfið vegna ástandsins á Gasa. Undirrituð krefjast þess að íslensk stjórnvöld bregðist við atburðunum og krefjist þar vopnahlés og þrýsti á Ísrael um að stöðva árásir.

Samstaða um Gasa á Alþingi en pattstaða í átökum

Fulltrúar stjórnar- og stjórnarandstöðu náðu óvænt í dag samkomulagi um sameiginlega ályktun vegna átakanna á Gasaströndinni. Utanríkisráðherrar sjö helstu iðnríkja heims kalla eftir að Gasa verði áfram undir stjórn Palestínumanna en án Hamas.

Náðu saman með ályktun um vopnahlé

Utanríkismálanefnd komst að samkomulagi um tillögu að þingsályktun á fundi sínum í morgun sem snertir á kröfu um vopnahlé á Gasa, fordæmingu á hryðjuverkum Hamas-samtakanna í Ísrael og fordæmingu á verknaði Ísraelsstjórnar í kjölfarið. Tillagan verður tekin fyrir á þinginu á morgun.

Nauðsynlegt að stöðva stríðsglæpi á Gaza strax

Þingflokksformaður Pírata segir mikilvægt að afstaða Alþingis gagnvart átökunum á Gaza liggi fyrir sem allra fyrst. Það liggi ljóst fyrir að stríðsglæpir hafi verið framdir á Gaza og þá verði að stöðva ekki síðar en strax.

Mest lesið


Fleiri fréttir

Sjá meira


×

Mest lesið