Dæmdur fyrir að af­höfða mann með flug­vél

Maðurinn var fundinn sekur um manndráp í morgun og dæmdur til tólf manaða skilorðsbundinnar fangelsisvistar, samkvæmt frétt Le Parisien.

Atvikið átti sér stað í júlí 2018. Þá fór hinn fjörutíu ára gamli Nicolas Galy um borð í flugvél með fallhlíf og klæddur í svifbúning. Minna en hálfri mínútu eftir að hann og nokkrir aðrir stukku úr flugvélinni lenti hann á væng hennar af svo miklum krafti að höfuð hans fór af búknum.

Alls stukku átta úr flugvélinni í fallhlíf til viðbótar við Galy og annan mann sem voru í svifbúningum.

Menn í svifbúningum falla ekki til jarðar eins og fólk í hefðbundnu fallhlífarstökki heldur geta þeir svifið um, eins og nafn búninganna gefur til kynna, og falla mun hægar til jarðar.

Í áðurnefndri frétt segir að samskiptaleysi hafi leitt til þess að flugmaðurinn lækkaði flugið hratt, um leið og Galy og hinir stukku úr flugvélinni, og stefndi aftur að flugvellinum. Það leiddi til þess að hann flaug á Galy.

Neyðarfallhlíf Galy opnaðist og höfuðlaust lík hans sveif til jarðar.

Fallhlífarskólinn sem flugmaðurinn starfaði við var einnig sektaður um tuttugu þúsund krónur, þar sem flugmaðurinn var ekki með virkt flugleyfi þegar Galy lést.