Rúmur helmingur Íslendinga, eða 51,4 prósent, hafa prófað rafhlaupahjól. Af þeim hafa 22,4 prósent notað þau undir áhrifum áfengis síðustu sex mánuði. Þetta kemur fram í nýjum niðurstöðum könnunar Samgöngustofu á aksturshegðun Íslendinga. Um er að ræða fækkun þeirra sem hafa notað þau undir áhrifum en í fyrra var hlutfallið 29,2 prósent. Það er 23 prósent fækkun á milli ára.
Ef litið er til heildarinnar eru það alls 11,5 prósent sem hafa prófað slík hjól undir áhrifum áfengis síðustu sex mánuði. Í fyrra, samkvæmt tilkynningu Samgöngustofu, voru það 14,6 prósent.
Í yngsta aldurshópnum, 18-24 ára hafa um 94 prósent prófað rafhlaupahjól. Af þeim hafa 29 prósent notað þau undir áhrifum áfengis á síðustu 6 mánuðum. Það er töluverð lækkun því hlutfallið var 37 prósent í fyrra. Það þýðir að 27,2 prósent Íslendinga á aldrinum 18 til 24 ára hafa prófað að nota rafhlaupahjól undir áhrifum áfengis á síðustu sex mánuðum en sams konar mæling í fyrra sýndi 30,7 prósent.
Í könnuninni er einnig spurt hvað fólki finnist um slíka hegðun og segja alls 88,2 prósent að notkun rafhlaupahjóla eða rafvespa undir áhrifum áfengis sé óásættanleg hegðun, þar af segja 71 prósent að hún sé mjög óásættanleg.
Vilja áfengismæla og hjálmaskyldu
Í tilkynningu Samgöngustofu kemur einnig fram að alls hafi yfir 400 opin svör borist um það hvaða takmarkanir fólk myndi vilja sjá. Þar voru nefnd sem dæm aldurstakmörk, að loka rafhlaupahjólaleigum á kvöldin, að koma á hjólin áfengismælum, að sett yrði hjálmaskylda og að sett yrðu upp sérstök svæði þar sem hjólin eru leið og þeim skilað.
Fleira er skoðað í skýrslunni eins og til dæmis farsímanotkun undir stýri en öll slík notkun eykst á milli ára, nema notkun samfélagsmiðla sem minnkað eilítið.
Fleiri eiga það til að tala í símann, með og án handfrjáls búnaðar, skrifa og lesa skilaboð, stjórna tónlist, taka myndir og nota netið. Þá kemur fram að þeim fjölgi sérstaklega sem skrifa og lesa skilaboð við akstur en auk þess nota æ fleiri símann til að stilla tónlist.
Er það orðin algengasta hegðunin er varðar farsímanotkun undir stýri að undanskildu því að tala í símann með handfrjálsum búnaði.
Í tilkynningu Samgöngustofu segir að notkun farsíma undir stýri sé ekki í neinu samræmi við það sem við teljum hættulegt.
Til að mynda séu 99 prósent Íslendinga sammála því að hættulegt sé að skoða samfélagsmiðla og nota símann til annarrar netnotkunar undir stýri en hins vegar eiga 23 prósent okkar það til að skoða samfélagsmiðla undir stýri og 21,5 prósent okkar eiga það til að nota hann til annarrar netnotkunar.
Að sama skapi telja 97 prósent okkar hættulegt að skrifa skilaboð undir stýri og 95 prósent okkar telja hættulegt að lesa skilaboð undir stýri. Hins vegar eiga tæp 32 prósent okkar það til að skrifa skilaboð undir stýri og rúm 40 prósent okkar eiga það til að lesa skilaboð undir stýri.
Í skýrslunni kemur einnig fram að hjálmanotkun á reiðhjóli eykst og hafa aldrei færri sagst sleppa hjálminum alltaf eða alls 10,6 prósent. Þá kemur fram að aksturshraði eykst á milli ára og aka færri á löglegum hraða.
Þá fækkað þeim sem segjast hafa ekið eftir að hafa drukkið að minnsta kosti einn drykk en þeim fjölgar sem segjast hafa ekið eftir að hafa drukkið tvo drykki eða fleiri.
