Maður margra dulargerva gómaður eftir mörg ár á flótta

Alríkislögregla Bandaríkjanna hafði lýst eftir manninum, sem heitir réttu nafni Tyler Adams og er 51 árs gamall. Hann hefur þó brugðið sér í allra kvikinda líki og notast við ýmis dulnefni, líkt og Aaron Lee, David Smith, Dominic Braun, David Phillips, Kevin Schoolcraft, Kevin Kennedy, Michael Whitman, Lance Irwin, Brice Johnson, Matthew Kashani, Taylor Chase og Joshua Smith.

Miðlar vestanhafs fjalla um málið, en þeir greina frá því að Adams hafi verið að afplána fangelsisdóm í Hawaii vegna þjófnaðar á 130 þúsund bandaríkjadölum, sem jafngildir tæpum átján milljónum króna. Hann var einnig dæmdur fyrir að stela hring úr verslun Costco, en andvirði hringsins er sagt hafa verið fimm þúsund dollarar, eða tæplega 700 þúsund krónur.

CBS greinir frá því að Adams hafði áður komist í kast við lögin með því að nota auðkenni foreldra sinni til að safna upp þriggja milljón dala skuld, sem í dag jafngildir rúmum fjögur hundruð milljónum króna. Fyrir það hlaut hann sjö ára fangelsisdóm í borginni San Diego í Kaliforníuríki.

Kærastan fannst í bílskotti

Líkt og áður segir slapp Adams úr fangelsi á Hawaii. Á meðan hann var á flótta átti hann í ástarsambandi við Racquel Sabean. Hún hélt að hann héti Paul Philips, en saman eignuðist þau dóttur.

Þau fóru saman yfir landamæri Bandaríkjanna til Mexíkó í apríl í fyrra, en rúmum mánuði síðar fundust líkamsleifar Sabean í mexíkósku borginni Tíjúana, nánar tiltekið í skotti bíls hennar, Volkswagen Jetta. Dóttir þeirra fannst heil á húfi.

Þess má geta að Adams hefur ekki verið kærður fyrir að verða Sabean að bana, eða fyrir eiga þátt í andláti hennar á annan hátt.

New York Post segir að Adams hafi verið yfirheyrður vegna hvarfs Sabean og daginn eftir það hafi hann snúið aftur til Bandaríkjanna, og notast við dulnefnið Aaron Bain til þess.

Varð fyrir tilviljun vitni að handtökunni

NBC fjallar einnig um málið, en í frétt miðilsins kemur fram að það hafi verið þann 30. nóvember sem Adams hafi verið handtekinn.

Hann hefur verið ákærður fyrir fjölda brota, líkt og fyrir bílaþjófnað og fyrir að framvísa fölsuðum skilríkjum. Þá höfðu nokkrar handtökuskipanir verið gefnar út á hendur honum, meðal annars vegna fangelsisflóttans í Hawaii.

Faðir Racquel Sabean, David Sabean, hélt því fram, í viðtali við NBC, að hann hafi fyrir tilviljun orðið vitni að handtöku Adams í Kaliforníuríki í nóvember.

„Ég sé hann og hugsa; bíddu nú við. Hann er í gulum bol, hvítum buxum og skóm. Þessi lítur út eins og maðurinn sem myrti dóttur mína,“ segir hann. Líkt og áður segir hefur Adams ekki verið kærður vegna morðsins, en faðirinn er sannfærður um að hann beri ábyrgð á því.