Land­læknir, ráð­herrar og rit­höfundar orðaðir við Bessa­staði

Nú fer í hönd sá tími þar sem fólk ýmist mátar sig eða aðra í embætti forseta Íslands. Andrés Jónsson, eigandi Góðra samskipta, leggur mikinn metnað í þessar bollaleggingar og hefur útbúið viðamikið skjal yfir það fólk sem er orðað við framboð.

„Þú þarft eiginlega að hafa sýnt fram á að þú hafir þessa hæfni sem til þarf eða staðið vel í krefjandi aðstæðum eða komið að einhverjum málaflokki sem er íslensku þjóðinni dýrmætur,“ segir Andrés um mögulega frambjóðendur.

Heilbrigðiskerfið er einn þessara málaflokka sem stendur þjóðinni nærri.

„Þar getum við nefnt Ölmu Möller landlækni, Björn Zoëga forstjóra Karólínska, Pál Matthíasson fyrrverandi forstjóra Landspítalans.“

Þá hafa nokkrir úr heimi menningar og lista verið nefndir.

„Magnús Geir Þórðarson, þjóðleikhússtjóri, Sigríður Hagalín Björnsdóttir hefur verið nefnd, og Brynhildur Guðjónsdóttir Borgarleikhússtjóri.“

„Svo gætum við jafnvel farið í viðskiptalífið. Það hefur í rauninni ekki komið forseti þaðan en Hörður Arnarson hefur lengi verið forstjóri Landsvirkjunar og hefur notið aukins trausts eftir því sem á hefur liðið. Ásta Fjeldsted nýtur virðingar í sínu starfi og er ungur forstjóri í Kauphöllinni, Rannveig Rist hefur oft verið nefnd og einhverjir fleiri.“

Loks hafa þónokkrir verið nefndir sem starfa á hinu pólitíska sviði.

„Katrínar Jakobsdóttir er auðvitað nefnt af mörgum og var nefnt af mörgum kannski hér fyrir fjórum árum og hefur aðeins hrapað í persónulegum vinsældum síðan en ekki spurning að hún yrði mjög sterk, færi hún fram og síðan má nefna fólk sem nýtur trausts fyrir utan sínar raðir, Willum Þór, heilbrigðisráðherra, væri hægt að nefna, Kjartan Már Kjartansson bæjarstjóri í Reykjaesbæ hef ég heyrt.“

Svo eru það þau sem hafa yfirgefið hið pólitíska svið. „Ingibjörg Sólrún, Össur Skarphéðinsson, jafnvel Geir Haarde og Þorsteinn Pálsson þannig að það er leitað líka í þennan flokk, ekki spurning.“

Andrés býst við að málið liggi ljóst fyrir í kringum páska og að margir verði í framboði og kappræðurnar fjörugar.

„Þetta verður sprettur, þetta er óvænt og það er fullt af fólki sem hefur einhvern tímann mátað sig í þetta sem bjóst ekki við þessu, nú þarf það að ákveða hvort það ætli að stökkva eða hrökkva því forsetar sitja oft einmitt í tólf til tuttugu ár þannig að tækifærin koma ekki oft á ævinni, ef þú hefur þennan draum í maganum.“

Ákvörðun Guðna kom mörgum á óvart, sérstaklega í ljósi vinsælda hans.

„Þau hjónin eru bæði mjög vinsæl og farsæl og ég held að sagan muni fara mjúkum höndum um Guðna fyrir að hafa gert einmitt þetta.“