Stjórn KKÍ úr­skurðar að Danielle verði ís­lenskur leik­maður

Stjórn KKÍ hefur nú fundað um málið og úrskurðað um það að grein fimmtán í reglugerð um Körfuknattleiksmót eigi ekki við í þessu tilfelli.

Í grein fimmtán stendur: Sá sem hefur leiktíðina sem erlendur leikmaður utan EES ríkis telst sem slíkur út leiktíðina og skal miða við fyrsta leik í móti á vegum KKÍ (Íslandsmót, bikarkeppnir eða önnur mót/leikir á vegum KKÍ), nema að fenginni undanþágu stjórnar KKÍ.

Stjórnin hélt reglubundinn stjórnarfund í gær og þar var mál Danielle tekið fyrir.

Samkvæmt heimildum Vísis var það mat stjórnar að grein fimmtán í reglugerð um körfuknattleiksmót eigi ekki við í máli Danielle þar sem hún hefur nú öðlast íslenskan ríkisborgararétt.

Grindvíkingar geta því bætt við lið sitt nýjum bandarískum leikmanni hafi félagið áhuga á slíku.

Danielle hefur verið frábær með Grindavíkurliðinu í vetur en þær grindvísku hafa komið skemmtilega á óvart með góðri frammistöðu. Hún var með 18,4 stig, 9,4 fráköst og 5,7 stoðsendingar að meðaltali í fyrstu ellefu leikjunum.

Fyrsti leikur hennar sem Íslendingur verður á móti Haukum í Smáranum í kvöld.