Spjaldið dregið til baka og Calvert-Lewin sleppur við bann

Calvert-Lewin fékk að líta beint rautt spjald fyrir brot á Nathaniel Clyne þegar rétt rúmar tíu mínútur voru eftir af venjulegum leiktíma er Everton heimsótti Crystal Palace í þriðju umferð FA-bikarsins. Upprunalega fékk leikmaðurinn gult spjald fyrir brotið, en eftir skoðun myndbandsdómara var litnum á spjaldinu breytt í rautt.

Félagið áfrýjaði hins vegar spjaldinu og enska knattspyrnusambandið hefur nú samþykkt áfrýjunina. Calvert-Lewin þarf því ekki að taka út þriggja leikja bann og getur leikið með liðinu er Everton tekur á móti Aston Villa í ensku úrvalsdeildinni næstkomandi sunnudag.

Þá getur framherjinn einnig tekið þátt í seinni leik Everton og Crystal Palace, en þau þurfa að mætast á ný í þriðju umferð eftir markalaust jafntefli í fyrri leiknum.