Össur kaupir þýskt stoðtækjafyrirtæki

Kaupverð [e. enterprise value] Fior & Gentz er 100 milljónir evra sem samsvarar um það bil 15 milljörðum íslenskra króna auk árangurstengdrar viðbótargreiðslu [e. Earnout] sem er áætluð 10 milljónir evra eða um það bil 1,5 milljarðar íslenskra króna. Össur greiðir 60 milljónir evra í reiðufé, sem er að hluta fjármagnað með aukinni lántöku, ásamt því að gefa út nýtt hlutafé að virði 25 milljónum evra til seljenda Fior & Gentz. Það sem eftir stendur, 15 milljónir evra, verður greitt út í reiðufé að tveimur árum liðnum.

Sækja inn á nýjan markað

Í tilkynningu Össurar segir að sala Fior & Gentz árið 2023 hafi verið um það bil 21 milljón evra sem samsvarar um 3,2 milljörðum íslenskra króna. Þá segir að sala hafi aukist um 16 prósent frá árinu áður og EBITDA framlegð hafi verið 30 prósent. Á tímabilinu 2020 til 2022 var árlegur söluvöxtur að meðaltali 14 prósent. Þýskaland er stærsta markaðssvæði félagsins en félagið selur einnig vörur sínar á alþjóðlegum mörkuðum.

„Með kaupunum á Fior & Gentz sækjum við inná nýjan markað og því falla kaupin afar vel að vaxtarstefnu okkar og þeirri áherslu að bjóða heildarlausnir fyrir fleiri einstaklinga. Jafnframt nýtum við þau samlegðaráhrif sem nást af sameiginlegum dreifileiðum, þar sem einstaklingar sem þurfa á sérsmíðuðum spelkum að halda eru þjónustaðir í stoðtækjaverkstæðum um allan heim. Sala Fior & Gentz hefur hingað til verið að mestu leyti í Þýskalandi og eru því umtalsverð tækifæri til að ná til fleiri sjúklinga með alþjóðlegu söluneti Össurar. Það er okkur sönn ánægja að bjóða teymi Fior & Gentz velkomið til Össurar og við hlökkum til að vinna saman í þágu viðskiptavina okkar og sjúklinga um allan heim,“ segir Sveinn Sölvason, forstjóri Össur, í tilkynningunni.

Fior & Gentz framleiðir íhluti fyrir sérsmíðaðar spelkur fyrir sjúklinga með skerta hreyfigetu sökum tauga- og vöðva sjúkdóma á borð við heilablóðfall, mænuskaða og MS. Fior & Gentz var stofnað árið 1997 í Þýskalandi og hjá félaginu starfa um 80 einstaklingar.

„Við erum spennt fyrir að verða hluti af Össuri og því góða starfi sem þau hafa unnið til að bæta hreyfanleika fólks um allan heim. Vöruframboð okkar á einstaklega vel við víðtækt vöruframboð Össurar og við erum full eftirvæntingar að halda áfram á þeirri vaxtarvegferð sem framundan er með Össuri,” segja Jörg Fior og Ralf Gentz seljendur Fior & Gentz.

Stjórnvöld þurfa ekki að samþykkja kaupin

Í tilkynningu kemur einnig fram að í tengslum við kaupin hafi stjórn Össurar ákveðið að nýta heimild í fimmtu grein samþykkta félagsins til að gefa út 6.636.122 nýja hluti í Össuri og þar með hækka heildarhlutafé um 1,6%, frá 421.000.000 króna að nafnverði í 427.636.122 króna. Áskriftarverð fyrir hverjum hlut er 28,10 danskar krónur og því er heildarvirði hlutafjárhækkunarinnar 186 milljónir danskra króna eða 25 milljónir evra. Hluthafar Fior & Gentz skrá sig fyrir öllum útgefnum hlutum.

Um fjárhagsleg áhrif kaupanna segir að þau séu „til þess fallin að ýta undir bæði söluvöxt og rekstrarhagnaðarhlutfall (EBITDA) Össurar. Í tengslum við kaupin mun skuldsetningarhlutfall Össurar, að öllu óbreyttu, fara tímabundið yfir 2.0-3.0x EBITDA markmið félagsins.“

Þá segir að kaupin séu ekki háð samþykki yfirvalda. Össur mun birta afkomuspá fyrir 2024, ásamt áhrifum af kaupunum á Fior & Gentz, í tengslum við birtingu á ársskýrslu félagsins fyrir árið 2023 þann 30. janúar 2024. Þá fer fram rafrænn fjárfestafundur í dag klukkan tíu. Hægt er að fylgjast með hér.