Ræddu nauð­syn þess að draga úr spennu

Á fundinum eru mennirnir sagðir hafa rætt samvinnu ríkja á svæðinu til að stuðla að enda átakanna á Gasa. Þá ræddu þeir einnig bráða nauðsyn þess að draga úr spennu á svæðinu, sem hefur meðal annars brotist út í skæruárásum á herlið Bandaríkjanna og bandamenn.

Bandarísk hermálayfirvöld staðfestu í gær að þau hefðu gert árásir á það sem Reuters hefur kallað „drónabáta fulla af sprengiefnum“, á vegum Húta í Jemen. Á sama tíma greindu Bretar frá því að skotið hefði verið á breskt skip á Rauðahafi. Smávægilegar skemmdir hefðu orðið á skipinu.

Jake Sullivan, ráðgjafi Joe Biden Bandaríkjaforseta í þjóðaröryggismálum, sagði í gær að í væntanlegri heimsókn hans til Ísrael myndi Blinken freista þess að þrýsta á þarlend stjórnvöld að hleypa aukinni neyðaraðstoð inn á Gasa.

Staðan á svæðinu fer enn versnandi og miklar áhyggjur eru uppi vegna aukinna árása Ísraelsmanna á Rafah, þar sem hundruð þúsunda dvelja nú eftir að hafa yfirgefið heimili sín. Fólk streymir enn að, til að mynda frá Khan Younis sem enn sætir árásum, en frá Rafah kemst fólk hvergi vegna lokaðra landamæra.