Mest borgað fyrir leigu í austur­hluta Kópa­vogs

Þetta er meðal þess sem kemur fram í úttekt Húsnæðis- og mannvirkjastofnunar sem unnin er upp úr nýrri leiguskrá sem er hluti af Húsnæðisgrunni HMS.

Fram kemur að lesa megi úr gögnum leiguskrár að meðalleiga á hvern fermetra á höfuðborgarsvæðinu sé hæst í póstnúmeri 107 eða rúmlega 4.200 krónur og er fermetraverð þar 13 til 16 prósent hærra en í póstnúmerum 101, 102 og 105 sem koma þar á eftir. 

„Lægsta meðalfermetraverðið er í póstnúmerum 103 í Reykjavík og svo 201 og 203 í Kópavogi en í þessum þremur póstnúmerum er leiguverð undir 3.000 kr. á fermetra.

Heildarfjárhæð greiddrar leigu er hins vegar hæst í póstnúmeri 203, þar sem leigjendur greiða að meðaltali 293 þúsund krónur á mánuði. Til samanburðar er meðalleiga í póstnúmeri 107 207 þúsund krónur á mánuði. Í póstnúmeri 203 má einnig finna stærstu leiguíbúðirnar, en að meðaltali eru þær um 108 fermetrar, samanborið við 59 fermetra meðalstærð í póstnúmeri 107, líkt og sjá má á mynd hér að ofan.

Líkt og myndin gefur til kynna er stærð leiguhúsnæðis ráðandi þáttur í leiguverði á höfuðborgarsvæðinu. Staðsetning leiguhúsnæðisins hefur þó einnig áhrif, en meðalleiguverð á hvern fermetra er hærra í póstnúmerum sem eru nálægt miðbæ Reykjavíkur.

Ef litið er til höfuðborgarsvæðisins í heild sinni nemur miðgildi leiguverðs á hvern fermetra 3.269 kr. sem er 17% hærra en miðgildi fermetraverðs í nágrenni höfuðborgarsvæðisins. Annars staðar á landinu var miðgildi verðs á leigu rétt rúmlega 2.000 kr. á fermetra. Líkt og sjá má á mynd hér að neðan má sjá marktækan mun á verði á fermetra eftir stærð íbúða og er það t.d. yfir 3.500 kr. fyrir tveggja herbergja íbúð á höfuðborgarsvæðinu en undir 2.500 kr. fyrir fjögurra herbergja íbúð á sama svæði,“ segir á vef HMS.