Um 280 börnum rænt í bænum Kuriga í Nígeríu

Nemendurnir eru á aldrinum 8 til 15 ára.

Mannránsgengi hafa rænt hundruðum barna og fullorðinna í Nígeríu síðastliðin ár en dregið hafði úr slíkum atvikum þar til nú. 

Mannránið var staðfest af Uba Sani, ríkisstjóra Kaduna.

Að sögn ríkisstjórans var um 300 börnum rænt en 25 tókst að sleppa.

Vitni sagði stúlku hafa verið skotna í árásinni og þá sagði kennari sem tókst að sleppa að íbúar hefðu freistað þess að koma börnunum til bjargar en verið fældir á brott af byssumönnunum. Einn hefði verið drepinn.

Samkvæmt BBC eiga nær allar fjölskyldur í bænum barn í skólunum sem um ræðir, sem virðast hafa verið tveir, og herinn hefur heitið því að finna þau öll.

Þetta er annað fjöldamannránið sem á sér stað í Nígeríu á aðeins nokkrum dögum en fyrir skömmu var konum og börnum rænt, að því er talið af Boko Haram, þegar þau voru að safna eldivið.

Ekki er talið að tengsl séu á milli þessa atviks og mannránsins í dag.

Stjórnvöld í Nígeríu settu lög árið 2022 til að freista þess að draga úr mannsránum en þau banna fólki meðal annars að greiða lausnargjald. Enginn hefur verið handtekinn á grundvelli laganna hingað til.

Ítarlega frétt um málið má finna á vef BBC.