Börn fundist með­vitundar­laus eftir landa­drykkju

Fyrir um ári síðan fóru þeir sem starfa með og í kringum unglinga að verða varir við aukna hópamyndun við verslunarkjarna í borginni og víðar.

„Þetta eru orðnir stærri hópar af krökkum að koma. Meira kannski hópar, ekki einhver einn hópur úr ákveðnu hverfi, heldur eru þau að koma stök eða fá úr mörgum hverfum og sveitarfélögum að hittast á einhverjum ákveðnum stað. Mörg bara forvitin en inni í þessum hóp er líka mikil áhættuhegðun. Þannig við höfum miklar áhyggjur af því hvað gerist í kringum þennan hóp þegar hann er eftirlitslaus.“ segir Kári Sigurðsson verkefnastjóri forvarna hjá skóla- og frístundasviði.

Hann segir að um fólk á allskonar aldri sé að ræða en aðalhópurinn séu börn frá 7. upp í 10. bekk grunnskóla. 

„Þeirra tengslanet er orðið miklu stærra heldur en það var bara í gegnum samfélagsmiðla. Þannig að þau sjá eitthvað á TikTok eða sjá eitthvað á Instagram sem er spennandi. Það er stór hópur að hittast í Skeifunni eða stór hópur að hittast í Kringlunni og þau langar bara til að vera hluti af því.“

Ofbeldismál og neysla

Kári fer fyrir Flotanum sem er sameiginlegt vettvangsstarf frístundamiðstöðva í Reykjavík. Hann er jafnframt verkefnastjóri forvarna hjá skóla- og frístundasviði Reykjavíkurborgar. Hann segir hópamyndun ekki alltaf neikvæða en að fylgjast þurfi vel með henni.

„Þetta eru ekkert allt hópar af krökkum sem eru að koma í Kringluna og Skeifuna að gera eitthvað neikvætt en þarna þurfum við að standa svolítið þétt saman og fylgjast með að allt fari vel fram. Vegna þess að því miður dragast síðan að eldri einstaklingar sem að reyna að ná til þeirra með allskonar annarlegar ástæður fyrir því.“

Þá sé eitt af því sem fylgi hópamynduninni drykkja unglinga.

„Við erum allt í einu farin að sjá landa aftur og landabrúsa og krakka komna með landa. Neikvæðu hliðarnar af þessu eru ofbeldismál og neysla og ekkert endilega bara áfengi heldur líka annað. Þannig að inni í þessum hópi eru krakkar í mjög viðkvæmri stöðu sem eru bara ekki á góðum stað,“ segir hann.

Ýmis alvarleg mál hafi komið upp í kringum hópana sem hafa myndast.

„Alvarlegustu atvikin eru bara mjög þung neyslumál þar sem krakkarnir eru bara meðvitundarlausir og við höfum átt í erfiðleikum með að finna út hvaðan þeir koma. Síðan gróf ofbeldismál þar sem þau eru kannski að útkljá mál sín á milli.“

Ýmsir hlutir sem þarf að skerpa á eftir Covid

Þá hafa sum foreldrafélag grunnskólanna endurvakið foreldrarölt í hverfunum og segir Kári það mikilvægan þátt í að sporna gegn því ástandi sem myndast hefur.

„Öryggistilfinningin í hverfinu verður svo mikil. Fullorðnir aðilar sem eru í einhverjum annarlegum tilgangi að koma inn í hverfin, þetta hefur fælingarmát gagnvart þeim að þeir sjái og viti að það er virkt foreldrarölt.“

Foreldrar þurfi að átta sig á að hópamyndunin eigi sér ekki bara stað á kvöldin heldur einnig fyrr á daginn. Þá sé mikilvægt að foreldrar séu vakandi.

„Við þurfum líka bara sem foreldri, ég sjálfur foreldri, að átta mig á því þekki ég vinahóp stráksins míns. Þekki ég þau sem eru í kringum hann. Þekki ég foreldrana. Þetta eru kannski hlutir sem eru svolítið búnir að gleymast sem var held ég sterkari fyrir Covid.“