Dómari þarf ekki að víkja vegna fjölskyldutengsla í máli feðga

Dómarinn á að dæma í máli þar sem þrotabúið fer fram á að samningi verði rift sem feðgarnir Jón Hilmar og Karl gerðu árið 2014. Þar keypti Jón félagið Toska ehf. af föður sínum á rúma milljón króna þegar virði þess á að hafa verið talsvert meira, hlaupið á milljörðum króna. Héraðsdómur Reykjaness dæmdi Jón Hilmar til að greiða þrotabúinu tæplega 465 milljónir króna haustið 2022. Þeim dómi hefur verið áfrýjað til Landstéttar.

Jón Hilmar krafðist þess að Landsréttardómarinn myndi víkja sæti þar sem náin tengsl væru á milli Karls Wernerssonar og systursonar dómarans. Þá starfaði systursonurinn sem tamningamaður hjá Feti ehf, sem er dótturfélag Toska ehf, en dómsmálið varðar það félag að miklu leiti.

Þar að auki var bent á að dómarinn hefði áður dæmt í öðru dómsmáli þrotabús Karls, en í þeim dómi hafi verið tekin afdráttarlaus afstaða til gjaldfærni Karls árið 2016. Vísað er til þess dóms í málsástæðum þessa máls, sem að mati Jóns eru til þess fallnar að draga óhlutdrægni dómarans í efa. 

„Það eitt að systursonur dómarans starfi hjá félagi sem er hluti af samstæðu þess félags, Toska ehf., sem mál þetta snýr að getur ekki valdið því að dómarinn verði talinn vanhæfur til meðferðarmálsins,“ segir í úrskurði Landsréttar sem féllst ekki á kröfuna. 

Jafnframt sagði Landsréttur að ekkert lægi fyrir um að systursonur hans hefði nokkra persónulega eða fjárhagslega hagsmuni í niðurstöðu málsins sem gætu skipt máli. Góð vinátta dómarans og systursonarins gæti síðan ein og sér ekki leitt til vanhæfis. 

Þá segir einnig að það að dómarinn hafi áður dæmt um sakarefni í einu máli þá leiði það ekki til vanhæfis í öðru máli.

Fjölskyldutengslin of fjarlæg að mati Hæstaréttar

Jón Hilmar skaut þessum úrskurði Landsréttar til Hæstaréttar og gerði athugasemdir við að þrír dómarar málsins í Landsrétti, þar með talinn sérfróður meðdómandi, hefðu tekið afstöðu til málsins. Dómarar ættu sjálfir að kveða upp úrskurði um það hvort þeir viku sæti, og ekki væru lagaskilyrði um að meðdómandi kveði upp úrskurði um annað en frávísun máls.

Í dómi Hæstaréttar segir að umræddar athugasemdir taki mið af málsmeðferð í héraði þar sem einn dómari skipi að jafnaði dóminn. Landsréttur sé fjölskipaður dómur og að öllum dómurum máls beri að ráða til lykta atriðum um rekstur þess.

Þar að auki tók Hæstiréttur fyrir fjölskyldutengslin sem Jón Hilmar telur að eigi að gera dómarann vanhæfan.

„Telja verður að þessi aðstaða sé svo fjarlæg í máli þessu að hún verði ekki með réttu talin hafa áhrif á dómarann,“ segir í dómi Hæstaréttar, sem líkt og áður segir staðfesti úrskurð Landsréttar.