Sigu niður í Gretti sterka og dældu úr honum sjó

Í tilkynningu frá Landhelgisgæslunni segir að áhöfn dráttarbátsins hafi haft samband við stjórnstöð Landhelgisgæslunnar í kjölfar þess að báturinn tók inn á sig sjó vegna bilunar. 

TF-GRO, þyrla Landhelgisgæslunnar, og björgunarskipið Þór, frá Vestmannaeyjum, hafi haldið til móts við dráttarbátinn, sem hafi tekið stefnuna til Eyja þegar bilunarinnar varð vart. Þá hafi dráttarbáturinn Lóðsinn frá Vestmannaeyjum einnig verið beðinn um að halda á vettvang. 

Þyrlusveit Landhelgisgæslunnar hafi verið komin að dráttarbátnum um klukkan 23:30 og tveir sigmenn þyrlunnar hafi farið um borð í dráttarbátinn með sjódælur og hafið að dæla sjó úr bátnum. Sigmennirnir hafi orðið eftir í dráttarbátnum á meðan þyrlan hélt til Vestmannaeyja til að taka eldsneyti. Björgunarskipið Þór frá Vestmannaeyjum hafi verið komið á vettvang um klukkan 00:30 og flutt fleiri dælur um borð.

Í frétt Ríkisútvarpsins segir að Grettir Sterki sé kominn heill á húfi til Vestmannaeyja ásamt Lóðsinum.