KA sneri taflinu við í seinni hálf­leik

Heimamenn í KA voru sterkari aðilinn í leik kvöldsins, en þrátt fyrir það voru það gestirnir frá Ísafirði sem tóku forystuna á síðustu mínútu fyrri hálfleiks þegar Jeppe Gertsen kom boltanum í netið. Staðan í hálfleik því 0-1, Vestra í vil.

KA-menn voru þó ekki lengi að jafna sig og Rodri jafnaði metin fyrir heimamenn strax á þriðju mínútu síðari hálfleiks áður en Hans Viktor Guðmundsson skallaði hornspyrnu Daníels Hafsteinssonar í netið á 54. mínútu.

Tíu mínútum síðar var svo komið að Bjarna Aðalsteinssyni sem skoraði þriðja mark KA beint úr aukaspyrnu og gulltryggði norðanmönnum sigurinn.

Lokatölur því 3-1, heimamönnum í vil, og KA er því á leið í átta liða úrslit á kostnað Vestra sem situr eftir með sárt ennið.