Þor­steinn valdi þrjá ný­liða fyrir mikil­væga leiki

Þorsteinn Halldórsson, þjálfari íslenska kvennalandsliðsins í knattspyrnu, tilkynnti í dag hópinn sinn fyrir mjög mikilvæga leiki í undankeppni Evrópumótsins. Þorsteinn gerir fjórar breytingar á hópnum frá síðasta verkefni sem voru leikir á móti Póllandi og Þýskalandi í sömu keppni.

Cecilía Rán Rúnarsdóttir snýr aftur í hópinn og nýliðarnir Kristín Dís Árnadóttir, Katla Tryggvadóttir og Emilía Kiær Ásgeirsdóttir eru valdar í hópinn. Kristín Dís kom inn í hópinn um tíma í síðasta verkefni en var send aftur til baka þegar meiðsli Sædísar Rúnar Heiðarsdóttur voru ekki eins alvarleg og haldið var. Nú er Sædís hins vegar frá vegna meiðsla.

Auður Sveinbjörnsdóttir Scheving, Lára Kristín Pedersen, Bryndís Arna Níelsdóttir og Sædís Rún detta út úr hópnum.

Ísland og Austurríki eru bæði með þrjú stig og eitt mark í plús eftir tvær fyrstu umferðirnar í riðlinum. Þjóðverjar eru á toppnum með fullt hús. Tvö efstu liðin tryggja sér sæti í úrslitakeppni EM 2025.

Leikirnir við Austurríki gætu ráðið miklu um það hvort liðið nái þessu eftirsótta öðru sæti. Fyrri leikurinn fer fram í austurríski borginni Ried im Innkreis 31. maí en sá síðasti á Laugardalsvellinum 4. júní næstkomandi.

Nýliðinn Katla Tryggvadóttir hefur verið að gera frábæra hluti á fyrsta tímabili sínu sem atvinnumaður en hún skipti yfir í sænska liðið Kristianstad fyrir þetta tímabil.

Emilía Kiær Ásgeirsdóttir kemur inn í landsliðið í fyrsta sinn er hún er nítján ára leikmaður Nordsjælland í dönsku úrvalsdeildinni. Hún á íslenska föður en danska móður. Emilía, sem er sóknarmaður, hefur verið valin í úrtakshópa hjá yngri landsliðum Íslands en eftir að hún flutti til Danmerkur þá hefur hún leikið með yngri landsliðum Dana.

Markvörðurinn Cecilía Rán Rúnarsdóttir er aftur byrjuð að æfa með Bayern München eftir langa fjarveru vegna meiðsla. Hún kemur strax aftur inn í hópinn.

Agla María Albertsdóttir hefur spilað mjög vel með Breiðabliki í Bestu deildinni í sumar en hún er utan landsliðshópsins alveg eins og síðast.