Þolin­mæði saminganefnda á þrotum

Guðmundur og Kristján Þórður Snæbjarnarson, formaður Rafiðnaðarsambandsins, gáfu frá sér sameiginlega yfirlýsingu í dag þar sem þeir lýstu yfir vonbrigðum með vinnubrögð Samtaka atvinnulífsins og fyrirtækja í orkugeiranum þegar kemur að kjaraviðræðum. Þar segja þeir viðsemjendur sína ekki hafa sýnt fram á samningsvilja.

„Staðan er sú að félagsfólk þessara félaga innan orkugeirans hefur verið samningslaust í bráðum fjóra mánuði án þess að fram hafi farið raunverulegt samtal um kjör þess, öryggi eða starfsumhverfi,“ kemur fram í yfirlýsingunni.

Þar skrifa þeir jafnframt að samninganefndir félaganna tveggja séu að verða úrkula vonar um að skrifað verði undir nýjan samning. Næstu skref verði tekin með þá stöðu að leiðarljósi.

„Framganga SA við samningaborðið hefur ekki verið til þess fallin að þoka viðræðunum í rétta átt,“ skrifa þeir.

Fundir sem gætu verið tölvupóstar

Guðmundur segir lítið hafa hreyfst í viðræðunum síðustu vikurnar og segir samningsvilja viðsemjenda sinna vera lítinn. Viðræður séu ekki að stranda á launaliðnum heldur frekar atriðum eins og bakvöktum og útköllum.

Aðspurður segir hann ekkert ákveðið um næstu skref en að eitthvað þurfi að fara að breytast ætli Samtök atvinnulífsins að ná samningum.

„Við erum búin að eiga hérna nokkra fundi sem hefðu getað verið tölvupóstur. Það er ekki forsvaranlegt að kalla menn, utan af landi jafnvel, á fundi sem gerist ekki neitt á,“ segir Guðmundur.

„Við gerum okkur ekki alveg grein fyrir því hvort að þetta séu fyrirtækin eða hvort að SA er að halda utan um þetta þannig að þau vilji draga þetta einhverra hluta vegna en þá eiga menn bara að segja okkur það,“ bætir hann við.

Aðgerðir hefðu alvarlegar afleiðingar í för með sér

Komi til aðgerða gætu afleiðingar þeirra orðið skortur á rafmagni. Guðmundur segist þó vona að ekki þurfa að grípa til slíkra ráða.

„Víðtækust áhrifa eru náttúrlega það að það verður skortur á rafmagni. Það er hægt að bregðast við með því að skera niður hjá stóriðju til að láta önnur fyrirtæki hafa en það er þeirra vandamál. Við eigum bara eftir að taka þetta samtal og ég vona svo sannarlega að fyrirtækin setjist við borðið og við klárum þetta fljótt og vel,“ segir hann.

Er einhver fundur boðaður?

„Nei, enginn ákveðinn fundur eins og er en ég vonast til að við fáum að heyra í sáttasemjara fljótlega á morgun eða á hinn.“