Orða­lag þurfi að vera nægi­lega skýrt fyrir sæmi­lega upp­lýstan neytanda

Þetta kemur fram í ráðgefandi áliti EFTA dómstólsins í Vaxtamálinu svokallaða sem varðar málshöfðanir  á hendur íslenskum bönkum, sem í þessu tilfelli eru Íslandsbanki og Landsbankinn. 

Í tilkynningu frá dómstólnum segir að samningsskilmálar með umræddu orðalagi gætu valdið umtalsverðu ójafnvægi að því gefnu að dómstólar á Íslandi sannreyni efni skilmálanna.

Í tilkynningu frá Neytendasamtökunum er fullyrt að niðurstaða dómstólsins sé afdráttarlaus og lántökum í hag.

„Bönkunum er ekki heimilt að breyta vöxtum að vild og núverandi skilmálar bankanna uppfylla ekki skilyrði um skýrleika,“ segir í tilkynningu frá samtökunum.

Líkt og áður segir er um ráðgefandi álit að ræða sem íslenskir dómstólar, Héraðsdómur Reykjavíkur, Héraðsdómur Reykjaness og Landsréttur óskuðu eftir.

EFTA dómstóllinn áréttar þó að það sé dómstóla á Íslandi að kveða á um hvort samningar með umræddum skilmálum haldi gildi sínu.

Fréttin hefur verið uppfærð.