Fólkið sem er talið hafa brotið á Maltverjanum látið laust

Þetta staðfestir Jón Gunnar Þórhallsson, yfirlögregluþjónn hjá lögreglunni á Suðurlandi, í samtali við fréttastofu, en Landsréttur hafnaði gæsluvarðhaldskröfu lögreglunnar sem áður hafði verið samþykkt í héraði.

Rúv greindi fyrst frá því að gæsluvarðhaldið væri runnið út. 

Sakborningarnir eru grunaðir um að frelsissvipta manninn og fremja líkamsárás og fjárkúgun á maltneskum karlmanni í heimahúsi í Reykholti.

Í fyrstu voru fjórir Íslend­ing­ar handteknir: karlmaður á áttræðisaldri, dóttir hans og tengdasonur um þrítugt, og bróðir tengdasonarins. Einungis tveir voru eftir í gæsluvarðhaldi vegna málsins.

Í samtali við fréttastofu segir Jón að rannsókn málsins sé enn í fullum gangi og að hún gangi vel. Hann getur ekki sagt nákvæmlega til um það hversu margir hafi stöðu sakborngins að svo stöddu, en það séu nokkrir.