Tvö mörk tekin af Sviss í jafn­tefli gegn Skot­landi

Skotland og Sviss skildu jöfn 1-1 í annarri umferð Evrópumótsins í Þýskalandi. Sviss jafnaði eftir að hafa lent undir og tvö mörk voru svo tekin af þeim vegna rangstöðu.

Skotland komst yfir á 13. mínútu þegar Scott McTominay skaut að marki. Skotið var á leið í hendur markmannsins en Fabian Schar rak tánna út og breytti stefnu þannig að hann endaði í netinu. Afskaplega klaufalegt og Yann Sommer í markinu ekki sáttur með sinn mann.

Xherdan Shaqiri jafnaði metin fyrir Sviss á 26. mínútu með stórkostlegu skoti. Hann vann boltann eftir misheppnaða sendingu í öftustu línu Skota og skaut strax að marki. Fullkomin afgreiðsla í nærhornið og boltinn söng í netinu við samskeytin.

Svisslendingar settu boltann tvívegis aftur í netið en í bæði skipti var markið dæmt af. Fyrra atvikið átti sér stað á 34. mínútu þar sem Dan Ndoye skaut í netið eftir skallasendingu frá Ruben Vargas. Á 83. mínútu var það svo Breel Embolo sem hélt hann hefði skorað. Bæði mörk voru dæmd af samstundis vegna rangstöðu.

Skotland var á afturfótunum lengst af í leiknum og Sviss mun líklegri aðilinn en Skotar fengu frábært tækifæri til að taka forystuna aftur á 65. mínútu. Andy Robertson gaf þá fyrir úr aukaspyrnu og Grant Hanley stangaði boltann í stöngina.

Leikurinn endaði því með 1-1 jafntefli. Skotland er komið með stig á blað og Sviss er með fjögur stig eftir sigur gegn Ungverjalandi í fyrsta leik.