Langur dagur í vændum á þinginu en lík­lega sá síðasti

Þingfundur hófst klukkan 10, en fréttastofa ræddi við forseta Alþingis skömmu áður en hann hófst. Hann segir vonir standa til að hægt verði að klára þau mál í dag sem samkomulag náðist um að klára fyrir þingfrestun, en 36 mál eru á dagskrá fundarins.

„Dagurinn lítur þannig út að við gerum ráð fyrir því að byrja á einum atkvæðagreiðslupakka, sem verður dálítið langur hugsa ég. Síðan verða sjálfsagt umræður um nokkur dagskrármál sem eiga eftir að fá ákveðna umræðu síðdegis í dag. Síðan, eins og gengur á lokadögum þingsins, atkvæðagreiðslur og umræður til skiptis,“ segir Birgir Ármannsson, forseti Alþingis. 

Enn sé unnið í ágætu samstarfi eftir áætlun sem ákveðin hafi verið milli flokkanna í fyrrakvöld.

„Mér sýnist að það eigi að geta gengið upp í meginatriðum. Þannig að ég er ennþá bjartsýnn á að við getum lokið þinginu í dag, en auðvitað eru alltaf einhverjir óvissuþættir sem maður verður bara að bregðast við þegar upp kemur,“ segir Birgir. 

Málin verið skeggrædd 

Birgir segir ljóst að töluverð umræða sé eftir um ákveðin mál. Hann nefnir þar breytingar á almannatryggingakerfinu varðandi stöðu öryrkja og lögreglulög, auk fleiri mála. 

„Hins vegar held ég að það sé ekki von á neinum óvæntum eða miklum töfum á framgangi mála. Þetta eru að jafnaði mál sem eru búin að fá mikla umræðu í nefndum þingsins og flest þeirra hafa líka verið rædd töluvert. Þannig að ég held að þetta eigi allt að geta gengið vel fyrir sig. Hins vegar verður maður alltaf að setja ákveðinn fyrirvara þegar um þingstörfin er að ræða.“

Þetta er ágætis stabbi af málum, hvað sérðu fyrir þér að þið verðið lengi að? 

„Það hefur nú oft verið þannig að á lokadegi þingsins höfum við fundað lengi fram eftir. Við erum alveg viðbúin því að það verði. Þingmenn hafa auðvitað líka gert grein fyrir því að það gæti vel komið upp sú staða að við þyrftum að koma aftur saman hér eftir helgi. En mér hefur sýnst gangurinn vera með þeim hætti að við ættum að geta lokið þessu í kvöld,“ segir þingforsetinn. 

Þingmannamál sitja á hakanum

Örlað hefur á gagnrýni frá stjórnarandstöðunni þennan þingvetur, um að hún hafi borið skarðan hlut frá borði þennan þingveturinn. Í kvöldfréttum Stöðvar 2 sagði Björn Leví Gunnarsson, þingmaður Pírata, til að mynda að starf stjórnarandstöðunnar hafi aðallega falist í því að „koma í veg fyrir lélegustu málin frá ríkisstjórninni“ og að í nefndum væru 151 mál frá stjórnarandstöðunni sem meirihlutinn neiti að setja á dagskrá. Ekkert þingmannamál hafi komist að í vetur.

 Inntur eftir viðbrögðum við því sagðist Birgir ekki ætla að tjá sig um það sérstaklega. 

„Hvað varðar afgreiðslu einstakra mála þá eru það þingflokksformenn eða formenn flokkanna sem hafa átt í samræðum um það, þannig að ég ætla ekkert að kommentera á það. En það hefur auðvitað verið misjafnt í gegnum árin, hvernig háttað hefur verið afgreiðslu þingmannamála og þess háttar,“ segir Birgir.