Ein­beitti sér al­farið að Svedda Tönn

Daði Björnsson, Páll Jónsson timbursali, Jóhannes Páll Durr og Birgir Halldórsson hafa þegar hlotið á bilinu fimm til níu ára fangelsisdóma. Páll hlaut þyngsta dóminn en hann hefur fullyrt að hafa verið fengið í málið af Birgi og talið að um innflutning á sex kílóum væri að ræða.

Saksóknari hefur í gær og í dag leitt fyrrnefnda sakborninga fyrir dóminn sem vitni en þeir lítið vilja tjá sig um málið. Stór hluti hefur farið í að sýna fram á að Pétur Jökull hafi verið sá sem var á bak við dulnöfnin Harry, Nonni, Patron Cartoon og Trucker á dulkóðaða samskiptamiðlinum Signal.

Sá aðili gaf Daða Björnssyni fyrirmæli um hvernig hann ætti að huga að móttöku efnanna þegar þau kæmu til landsins. Daði virðist hafa verið neðstur í keðjunni en hann hlaut vægasta dóminn. Hann sagði í kjölfar handtöku að viðkomandi hefði heitið Pétur og fleira í máli hans bendir til að um Pétur Jökul sé að ræða. Daði neitaði því fyrir dómi í gær en vildi lítið tjá sig um málið.

Johnny Rotten að spjalla við Svedda tönn

Lögreglufulltrúar komu fyrir dóminn í morgun en þeir eru sannfærðir um að Pétur Jökull sé á bak við dulnöfnin. Við rannsóknina voru skoðuð samskipti aðila sem notaði dulnefnið Johnny Rotten við Sverri Þór Gunnarson, Svedda tönn.

Einn lögreglufulltrúi hafði það eina verkefni að kafa ofan í tengslin við Sverri Þór. Skoða tengingar við Sverri. Í máli hennar kom fram að notandinn Johnny Rotten, sem var skráður á spænskt númer, hefði rætt undir rós við Sverri Þór um fíkniefnaviðskipti. Þar notuðu þeir dulmál til að ekki sæist augljóslega að um fíkniefni væri að ræða.

Lögregla telur að Pétur Jökull hafi verið á bak við notandann Johnny Rotten en hann dvaldi nokkuð á Spáni á flakki sínu árið 2022. Lögregla vísaði meðal annars til þess að Johnny Rotten hefði rætt við Sverri utan Íslands en þann 27. júní 2022 hefði sá aðgangur hætt og samskipti hafist á nýjum aðgangi á Signal á nýjum síma.

Notandi færðist frá Evrópu til Íslands sama dag og Pétur Jökull

Lögreglufulltrúinn benti á að sama dag og viðskiptin hættu að fara fram á spænskum síma heldur á íslenskum hefði Pétur Jökull komið til Íslands frá Amsterdam. Nú hefðu það verið dulnöfnin Harry og Patron Cartoon sem hefðu tekið við í samskiptum við Sverri Þór.

Fulltrúinn var spurður að því hvað hefði bent til þess að sami aðili, sem lögregla telur vera Pétur Jökul, væri á bak við dulnöfnin þrjú. Fulltrúin nefndi að skilaboðin hefðu haldið áfram sem framhald af sama samtali, án nokkurs fyrirvara. Sverrir hefði greinilega vitað hvern hann væri að tala við. Í öllum þremur samskiptum hefði verið talað um Rúmenann, dulnafn fyrir einhvern einstakling.

Í samtali hafi verið talað um fíkniefni undir rós, skiptingu á hagnaði, burðardýr og vísað í fleiri en einum samskiptum til sama aðila sem kallaður var B. Þar hefur lögreglan rökdstuddan grun að um sé að ræða Birgi Halldórsson. Birgir sá um samskiptin við Pál Jónsson og Jóhannes Pál Durr í tengslum við innflutninginn.

Í samtalinu, sem lögregla telur ljóst að hafi verið milli Péturs Jökuls og Sverris Þórs, hafi verið rætt um sakborninga bæði í saltdreifaramálinu sem og þessu máli, stóra kókaínmálinu.

Lögregla telur Sverri Þór tengjast báðum málum en hann hefur þó ekki verið ákærður vegna málanna. Sverrir Þór var handtekinn í umfangsmiklum aðgerðum lögreglunnar í Brasilíu, meðal annars í samvinnu við íslensk lögregluyfirvöld, í fyrra. Hann hlaut tæplega sjö ára fangelsisdóm fyrr á árinu.