Raya hetjan er Skytturnar lögðu rútunni í Bergamo

Arsenal sótti Atalanta heim í 1. umferð Meistaradeildar Evrópu. Heimamenn í Atalanta voru eina liðið til að leggja Bayer Leverkusen á síðustu leiktíð þegar liðin mættust í úrslitum Evrópudeildarinnar og voru því sýnd veiði en ekki gefin.

Það var snemma ljóst að Skytturnar hans Mikel Arteta voru nokkuð sáttar með eitt stig og það var það sem þær fengu í kvöld þökk sé ótrúlegri markvörslu David Raya. Eftir heldur þurran fyrri hálfleik braut Thomas Partey af sér, að þessu sinni innan vítateigs, og vítaspyrna í kjölfarið dæmd þó dómarinn hafi skoðað brotið betur í varsjánni umtöluðu.

Á punktinn fór Mateo Retegui og tók einstaklega langt aðhlaup sem David Raya las líkt og um barnabók væir að ræða. Raya varði hins vegar boltann út í teig þar sem Retegui virtist bara þurfa að skalla þægilega í autt netið. Skalli hans var heldur laus sem gaf Raya tækifæri, markvörðurinn sýndi ótrúlegt viðbragð sitt og tókst að skutla sér á eftir boltanum og skófla honum af línunni. 

Ein af markvörslum ársins og staðan í Bergamo á Ítalíu enn markalaus. Þannig var hún allt til leiksloka og lokatölur því 0-0.