Þekkti þjálfarann og fékk því himnasendingu frá Reyðarfirði

Stefán Árni Pálsson skrifar 7. október 2024 15:31

Nik gerði Blika að Íslandsmeistarum á sínu fyrsta tímabili með liðið.

„Þetta var markmið okkar alveg frá því að ég tók við liðinu á síðasta ári ,“ segir Nik Chamberlain, þjálfari Breiðabliks, sem var gestur í lokaþætti Bestumarka kvenna eftir að ljóst varð að Blikar höfðu tryggt sér Íslandsmeistaratitilinn í knattspyrnu.

Mótið réðist í hreinum úrslitaleik gegn Val á útivelli og fór leikurinn 0-0 en jafntefli nægði Blikum. Nik var valinn þjálfari ársins að mati Bestu markanna.

„Við byrjum tímabilið vel þegar kemur að úrslitum og svo fór frammistaða okkar að verða alltaf betri og betri þegar leið á tímabilið. Síðan voru stelpurnar óstöðvandi seinnihluta tímabilsins og sérstaklega eftir bikarúrslitaleikinn.“

Tók tíu mínútur að ákveða sig

Nik þjálfari hjá Þrótti í sjö ár áður en hann tók við Blikum.

„Þegar ég fer frá Þrótti átti ég ár eftir af samningi mínum og var að vona að þeir myndu bjóða mér framlengingu og það kom aldrei fyrr ég hafði byrjað viðræður við Blikana. Þetta var mjög erfitt fyrir mig, hausinn á mér var út um allt og ég ræddi þetta vel og vandlega við foreldra mína. Eftir það samtal tók það tíu mínútur fyrir mig að ákveða að fara til Blika.“

Síðustu tíu tímabil hefur kvennalið Blika spilað leikkerfið 4-3-3. Nik var ekki lengi að breyta því. Hann fór að spila 3-4-3 og fékk til sín leikmenn til að það leikkerfi myndi virka. Samantha Smith kom til liðsins á miðju tímabili frá FHL. Þjálfari FHL er Björgvin Karl Gunnarsson sem er vinur Nik. Helena Ólafsdóttir spurði Nik einfaldlega að því hvað vinur hans hefði verið að pæla að leyfa honum að taka Smith yfir. „Hún er aldrei að fara aftur á Reyðarfjörð?,“ sagði Helena við Nik en FHL komst upp í Bestu-deildina í sumar.

„Já, ég veit það alveg og hann veit það sjálfur líka. Þú getur bara ekki stöðvað leikmenn að fara í betri lið. Ég ræddi við Björgvin Karl og spurði hann, ef þið erum komnar upp megum við þá taka hana? Og hann sagði já.“

Hér að neðan má sjá viðtalið í heild sinni við Nik frá því á laugardagskvöldið.

Klippa: Þekkti þjálfarann og fékk því himnasendingu frá Reyðarfirði

Besta deild kvenna Breiðablik