For­menn stjórnar­flokkanna hljóti að ræða fram­haldið

Fyrir landsfundi Vinstri grænna um síðustu helgi lá tillaga níu landsfundarfulltrúa um að slíta stjórnarsamstarfinu nú þegar. Í lokaályktun landsfundarins segir hins vegar "að ríkisstjórnarsamstarf við Sjálfstæðisflokk og Framsóknarflokk sé að nálgast leiðarlok og að æskilegt sé að boða til kosninga með vorinu.

Svandís Svavarsdóttir nýkjörinn formaður flokksins segir stjórnarsamstarfið á sínu síðasta ári. Ályktun landsfundar væri í takti við það sem hún hefði áður sagt varðandi næstu kosningar.

„Hvað þýðir að vori, það verða samtöl flokkanna að leiða í ljós. Hvað það þýðir og hvernig best er að koma inn einhverri skýrri dagsetningu þar. Við þurfum auðvitað líka að horfa á þau verkefni sem framundan eru,“ segir Svandís. Sjálf reikni hún með að leggja samgönguáætlun fram í þessu mánuði eða næsta, afgreiða þurfi fjárlög og fleiri mál.

Í ályktun landsfundar segir að "ríkisstjórnin hafi upphaflega verið mynduð árið 2017 í kjölfar óvæntra kosninga og í skugga pólitísks óróa." Síðan er talið upp að Vinstri græn hafi náð fram mikilvægum málum. "Til að hægt sé að halda ríkisstjórnarsamstarfinu áfram telur landsfundurinn að takast verði á við þau knýjandi verkefni sem við blasa á félagslegum grunni,“ segir í ályktun landsfundar.

„Nú er staðan orðin sú að ég hef tekið við formennsku í VG og það gerðist nú um helgina. Þar með eru mín orð þyngri en þau voru áður. Ég held að það gefi augaleið að við þurfum að setjast niður, formenn flokkanna,“ segir Svandís og ítrekar að forystufólk stjórnarflokkanna hittist reglulega.

„Tilefnið er augljóst þegar breytt er um forystu í einum stjórnarflokkanna. Það þurfi þá að ráða ráðum sínum og ég held að það sé fullt tilefni til. Ég vænti þess að heyra í þeim. Ég hef fengið aðeins kveðjur frá þeim,“ segir formaðurinn nýkjörni. Landsfundur væri æðsta vald Vinstri grænna og ályktun varðandi kosningar næsta vor samþykkt einróma.

„Það er komið að ákveðnum þolmörkum í baklandi og grasrót VG gagnvart samstarfinu. Og við teljum, og mínir félagar, að það sé mikilvægt að þau verkefni sem við ráðumst í núna á þessum síðasta vetri séu leyst á félagslegum grunni og félagslegum forsendum. Ég tek það umboð mjög alvarlega,“ segir Svandís.

Ríkisstjórnin lagði fram þingmálaskrá með 217 málum í upphafi þings í september. Svandís segir þingmálaskrá yfirleitt uppfærða um áramót og þá verði að laga hana að raunveruleikanum.

Hún ítrekar til dæmis að Vinstri græn muni ekki standa að frekari breytingum á útlendingalögum eins og dómsmálaráðherra hefur boðað. Nú þurfi að nema staðar og huga að inngildingu þeirra sem hingað koma.

„Og ég held við þurfum ekki að beita þeirri nálgun að koma með nýjar breytingar á útlendingalögum á hverju einasta þingi,“ segir Svandís Svavarsdóttir.