Vilja 62 milljónir til að tryggja vopna­birgðir lög­reglu og sérsveitar

Fram kemur í umsögninni að í frumvarpinu sé gert ráð fyrir 3,7 prósenta aukningu á fjárframlögum til lögreglunnar. Tekið er fram að lögreglan hafi verið undanskilin aðhaldskröfu á tímabilinu 2025 til 2029 en að öðru leyti hafi að litlu leyti verið komið til móts við breytt starfsumhverfi og krefjandi aðstæður löggæslunnar síðustu ár. Gert er ráð fyrir fjárheimild til embættis ríkislögreglustjóra upp á 4,5 milljarða. Þar af er gert ráð fyrir 3,6 milljarðar framlagi úr ríkissjóði en um 900 milljóna rekstrartekjum.

Í umsögn sinni áætlar embætti ríkislögreglustjóra að um 493 milljónir þurfi til að efla viðbragðs- og greiningargetu lögreglunnar til að tryggja að sérsveit geti mætt alvarlegum vopnaútköllum þar með talið með kaupum á búnaði og endurnýjun á bifreiðum og greiningardeild ríkislögreglustjóra með ásættanlegum hætti.

439 milljónir í búnað og bíla fyrir sérsveit

Í umsögn embættisins er að því loknu farið yfir ólík verkefni þess og hvað þau muni kosta. Sérstaklega er fjallað um alvarlegra ofbeldi og önnur afbrot. Þar kemur fram að rannsóknir lögreglu og eftirlit til að draga úr brotastarfsemi hafi þyngs verulega og að áhættu vegna skipulagðrar brotastarfsemi teljist mjög mikil á Íslandi. Þá segir að aukin notkun brotahópa á stafrænni tækni hafi aukið álag á ýmsum sviðum löggæslunnar. 

Því er talið nauðsynlegt að efla viðbragðs- og greiningargetu lögreglunnar til að tryggja að sérsveit geti mætt alvarlegum vopnaútköllum, þar með talið, með kaupum á búnaði og endurnýjun á bifreiðum og greiningardeild ríkislögreglustjóra með ásættanlegum hætti. Áætlaður kostnaður við slíkt er 439,75 milljónir króna árið 2025.

Tíðari mótmæli vegna átaka á Gasa

Þá er einnig í umsögn embættisins talað um öryggi æðstu stjórnar og að á grundvelli laga hafi ríkislögreglustjóri fengið sérstaka fjárveitingu á síðustu fjárlögum til að sinna löggæslu á Alþingi. Samningurinn muni falla sjálfkrafa úr gildi sé ekki gert ráð fyrir hinum í fjárlögum. Í nýju fjárlagafrumvarpi sé ekki gert ráð fyrir fjárveitingu. Lögreglan telur hins vegar að vegna til dæmis fjölgunar mótmæla vegna átaka á Gasa og fjölgunar heimsóknar erlendra gesta þurfi að tryggja áframhaldandi fjárveitingu.

„Er það mat embættisins að nauðsynlegt er að gera ráð fyrir áframhaldandi öryggisgæslu á vegum embættisins í þinghúsinu og gagnvart æðstu stjórn,“ segir í umsögninni og óskað eftir 165 milljónum til að gera það.

250 milljónir í verkefni tengt brottvísunum

Þá er einnig í umsögninni bent á að ekki sé gert ráð í fjárlagafrumvarpinu fyrir fjármagni fyrir heimferðar- og fylgdardeild, áður stoðdeild, en deildin tók við ýmsum verkefnum er varðar brottvísun þeirra sem hafa fengið endanlega synjun um vernd á landinu. Þar með talið rekstur húsnæðis í Hafnarfirði. Áætlaður kostnaður er metinn 250 milljónir.

Í umsögninni er einnig fjallað um gæðastjóra lögreglunnar og sálfræðiþjónustu og er í umsögninni bent á að árlegur kostnaður vegna gæðastjóra sé um 68,5 milljónir og að tryggja þurfi varanlega fjárveitingu. Þá óskar embættið eftir því að 20 milljónir verði festar í fjárlög til að tryggja lögreglumönnum og öðru starfsfólki sálfræðiþjónustu.

Þurfi að stækka og færa gagnaver lögreglunnar

Þá er einnig í umsögninni fjallað um landamæraeftirlit. Þar segir að viðfangsefnin landamæra á sviði löggæslu séu orðin mjög krefjandi og að vegna álags sé skilvirkt landamæraeftirlit „í raun ógerlegt“. Það geti leitt af sér aukna öryggisógn. Vísað er í nýja áætlun ráðherra og að vinnu við kostnaðargreiningu sé ólokið. Áætlað sé að hann verði um 2,5 milljarðar.

Sjá einnig: Á­hyggju­efni að innri landa­mærin séu ekki betur tryggð

Þá er að lokum fjallað um uppbyggingu tækniinnviða lögreglunnar og bent á að síðustu árum hafi mikilvægi gagna aukist verulega í löggæslu. Bæði gagna sem er aflað við rannsókn og gagnavinnslugetu. Þá hafi notkun ýmiss búnaðar eins og dróna og búkmyndavéla aukist síðustu ár. Gagnaver lögreglunnar þurfi því að stækka og flytja. Ekki sé gert ráð fyrir því í fjárheimildum til lögreglunnar.