Stóð með sjálfri sér og ekki talað við pabba sinn síðan 2015

Þetta er eitt af því sem kemur í ljós í samtali Sindra Sindrasonar við Sönnu Magdalenu Mörtudóttur í Íslandi í dag á Stöð 2 í vikunni. Hún vill verða þingmaður fyrir Sósíalistaflokkinn. Hún er fædd 3. maí 1992. Faðir hennar er frá Tansaníu og hefur aldrei komið til Íslands. Móðir Sönnu kynnist honum á Englandi.

„Hann hefur mikið verið inn og út úr mínu lífi, því miður er hann ekki nægilega áreiðanlegur og svona ýmislegt sem hefur gengið á. Mér skilst að hann sé edrú í dag en ég hef ekki talað við hann síðan 2015, sem kemur til vegna erfiðra og krefjandi samskipta þar sem ég ákvað að standa með sjálfri mér,“ segir Sanna og heldur áfram.

„Ég hafði alltaf haldið hurðinni opinni en þarna ákvað ég bara, nei, ég ætla ekki að taka þátt í einhverju svona. Hann gerði drama úr mjög litlu, kom illa fram, ásaka mann um hluti og í gegnum tíðina komið illa fram við mömmu mína sem hefur reynt að halda öllu opnu. Ég á sterka mömmu og mér finnst í raun ekkert vanta þó eitt foreldri sé ekki inni í myndinni.“

Hún segist ekki útiloka neitt ef faðir hennar myndi nálgast hana í dag og reyna mynda aftur samband við dóttur sína. Hér að neðan má sjá innslagið um Sönnu þar sem farið er yfir líf hennar, stefnumál í stjórnmálum og margt fleira.