Netanja­hú sendir flug­vélar til að sækja Ís­raela í Amsterdam

Lögregla í Hollandi hefur handtekið 62 manns eftir átökin sem brutust út á milli ungra heimamanna og ísraelskra stuðningsmanna Maccabi Tel Avív á Dam-torgi í miðborg Amsterdam. Þá greina hollenskir fjölmiðlar frá því að fimm hafi verið fluttir á sjúkrahús með áverka. 

Dick Schoof, forsætisráðherra Hollands, hefur fordæmt „árásir sem stjórnist af gyðingahatri“ og þá hefur Ísraelsher lýst atvikunum sem „alvarlegum og ofbeldisfullum“ árásum sem hafi beinst gegn Ísraelum.

Í frétt BBC segir að Schoof hafi með hryllingi fylgst með málinu og að hann hafi rætt við Netanjahú og sagt að árásarmennirnir myndu finnast og þeir verða ákærðir.

Lögregla hafði þegar handtekið nokkurn fjölda á Dam-torgi í aðdraganda leiksins, þar sem til átaka hafði komið milli stuðningsmanna Maccabi og palestínskra mótmælenda.

BBC segir frá því að á samfélagsmiðlum hafi birst myndbönd sem virðast sýna árásir á ísraelska stuðningsmenn en einnig af Ísraelum þar sem hrópuð eru slagorð gegn Palestínumönnum og palestínskir fánar rifnir niður.

Isaac Herzog Ísraelsforseti lýsti árásunum sem „pogrom“, hugtak sem notað er undir skipulagða hatursglæpi gegn gyðingum.