Vill losna við tálma úr vegi sínum

Útlit er fyrir að Repúblikönum hafi tekist að sigra í fjórum kjördæmum sem Demókratar stjórnuðu á síðasta kjörtímabili og bæti við sig örfáum sætum.

Af þeim átján sýslum þar sem ekki er búið að lýsa yfir sigurvegara, telja sérfræðingar AP fréttaveitunnar að helmingur þeirra séu líklegar til að falla í skaut Repúblikana og hinn helmingurinn fari til Demókrata. Það er að segja, að hvor flokkur fái níu sæti til viðbótar.

Fari kosningarnar svo hefðu Repúblikanar 223 sæti í fulltrúadeildinni og Demókratar 212. Til að mynda meirihluta þarf 218 sæti.

Fyrir kosningarnar voru Repúblikanar með 220 sæti og Demókratar með 212. Þar að auki sátu þrjú sæti laus en í þeim sátu tveir Demókratar og einn Repúblikani.

Trump getur hjálpað við kattasmölun

Repúblikanar í fulltrúadeildinni stefna að því að velja sér leiðtoga í vikunni og verður sá líklega forseti fulltrúadeildarinnar næstu tvö árin. Líklegt þykir að Mike Johnson verði valinn aftur, samkvæmt frétt Washington Post, en hann var tiltölulega óreyndur þegar hann var valinn í embættið, eftir miklar deilur innan þingflokks Repúblikanaflokksins.

Johnson hefur átt erfitt með að halda þingflokki sínum saman, þar sem meirihluti flokksins hefur verið mjög tæpur og hópur mjög íhaldssamra þingmanna hefur notað þá stöðu til að fá sínu framgengt á þinginu. Þetta hefur meðal annars leitt til þess að Johnson hefur þurft að leita á náðir Demókrataflokksins til að ná ákveðnum frumvörpum gegnum þingið.

Nú þykir hins vegar líklegt að Trump muni koma Johnson til aðstoðar og þrýsta á þingmenn til að greiða atkvæði í takt við áherslur hans.

Vill tálma úr vegi sínum

Eins og áður hefur komið fram er Trump þegar byrjaður að þrýsta á þingmenn Repúblikanaflokksins. Vill hann sérstaklega að Repúblikanar í öldungadeildinni fjarlægi tálma úr vegi hans og geri honum auðveldara að skipa menn í embætti.

Hann vill einnig að Repúblikanar komi í veg fyrir að dómarar verði skipaðir áður en hann sest að í Hvíta húsinu. Demókratar stjórna þó í öldungadeildinni þar til nýtt þingtekur við þann 3. janúar.

Trump lýsti því yfir í gærkvöldi að hver sá Repúblikani sem ætlaði sér að leiða flokkinn í öldungadeildinni, þar sem þrír Repúblikanar berjast um að taka við af Mitch McConnell, yrði að samþykkja að breyta reglum þingsins svo hann geti skipað menn í embætti án aðkomu öldungadeildarinnar.

Þingmennirnir þrír sem vilja leiða þingflokkinn; John Thune, John Cornyn og Rick Scott, hafa allir tekið vel í þessa kröfu Trumps, enda þykir ljóst að til að sigra í baráttunni um leiðtogasætið er stuðningur Trumps nauðsynlegur. Hann hefur ekki lýst yfir stuðningi við neinn í baráttunni enn en Scott þykir líklegastur til að bera sigur úr býtum.

Nokkrir þingmenn sem eru bandamenn Trumps hafa lýst yfir stuðningi við Scott og það hefur Elon Musk, auðugasti maður heims og ráðgjafi Trumps, einnig gert.

Öldungadeildin hefur ekki leyft forsetum að skipa í embætti án atkvæðagreiðslu frá því Hæstiréttur Bandaríkjanna takmarkaði árið 2014 vald forseta til að gera slíkt. Síðan þá hafa þingmenn passað að öldungadeildin fer sjaldan sem aldrei í frí. Á tímabilum þar sem þingmenn eru frá Washington DC í meira en tíu daga hafa örstuttir fundir verið haldnir formlega en ekkert gert á þeim.

Það hefur verið gert svo sitjandi forseti hafi ekki getað fyllt í stöður án atkvæðagreiðslu.

Á fyrsta kjörtímabili Trumps var hann oft sagður argur út í þingmenn fyrir að draga fæturna þegar kom að tilnefningum hans. Nú er hann byrjaður að leggja línurnar að því að mynda ríkisstjórn eins fljótt og hann mögulega getur.