„RÚV er sá fjöl­miðill sem er lík­lega einna lengst til vinstri á Ís­landi“

Í myndbandinu heldur Snorri áfram og segir að vinstri slagsíðan væri ekkert stórmál, nema fyrir þær sakir að skattgreiðendur þurfa að borga fyrir „allt dæmið“. Snorri tók svo til umfjöllun Ríkisútvarpsins um stefnu Miðflokksins í hælisleitendamálum, en þau sögðu yfirlýsta stefnu flokksins vera að enginn kæmi til landsins.

„Þarna er ekki tekið fram að við viljum í staðinn fyrir þetta hafa stjórn á málunum sjálf. Bjóða fólki í raunverulegri neyð til landsins og taka þá almennilega á móti því, ólíkt því óreiðuástandi sem nú ríkir,“

Einnig sagði hann að snúið væri út úr stefnu flokksins í loftslagsmálum. Í lokinn tekur hann fyrir kynningu Ríkisútvarpsins á Samfylkingunni í sambærilegu myndbandi á Tiktok, þar sem þau segja meginstefnu flokksins vera „jöfnuður, sjálfbærni og friður,“

„Miðflokkurinn styður þetta reyndar líka allt, en þið gleymduð að taka það fram ... Það mætti halda að markmiðið sé að láta okkur koma svolítið illa út,“ segir Snorri.

Fyrst og fremst tilraun til að réttlæta atriðin sem komu fram um Miðflokkinn

Snorri segir að hann hafi fundið fyrir einhverjum undarlegum undirtóni í umræddu Tiktok myndbandi, og flokkurinn hafi viljað gera þetta myndband til að fara yfir örfá atriði.

„Ég get auðvitað ekki borað mér leið inn í heilabú þessa fjölmiðlafólks til að fullyrða svo fullum fetum að þaðan sé rekin tiltekin pólitísk stefna af einbeittum ásetningi. En það er þó upplifun sífellt fleiri hlustenda að hlutleysis sé ekki gætt. Það ber að taka alvarlega. Mínar athugasemdir voru þó fyrst og fremst tilraun til að réttlæta ákveðin atriði sem komu fram um okkur,“ segir Snorri.

Hins vegar sé ekki galið að álykta út frá viðbrögðunum við myndbandinu að það sé tiltölulega útbreidd tilfinning meðal fólks að þessarar tilhneigingar gæti hjá Ríkisútvarpinu.

„Mér finnst þetta alveg umræða sem vert er að taka, hvort að Ríkisútvarpið endurspegli eitthvað sem fólk telur almennt vera hlutlausa nálgun á stjórnmálin. Það er erfitt, það er ekkert einfalt að gæta hlutleysis,“ segir Snorri.

Á vissan hátt sé óhjákvæmilegt að ákveðin pólitík myndist í flestum fjölmiðlum, það myndist ákveðin menning. Því sé það viss ómöguleiki að vera alveg hlutlaus, þótt það sé alltaf yfirlýst stefna. Sú annars göfuga stefna sé hæpnari í því upplýsingaumhverfi sem við búum við núna.

Fólk geti veitt Ríkisútvarpinu aðhald með frjálsri ráðstöfun útvarpsgjaldsins

Snorri segir að tillaga Miðflokksins um að fólk ákveði sjálft til hvaða fjölmiðils útvarpsgjaldið renni, leysi þennan vanda. Hann tekur þó sérstaklega fram að hugmyndin sé vitaskuld ótengd því hvernig þeim finnist pólitíkin liggja hjá Ríkisútvarpinu núna. Slíkt geti verið breytilegt eftir umhverfi, málið sé prinsippmál.

„Ef að það ríkir 100 prósent almenn ánægja með ríkisútvarpið eins og það er núna, þá myndi engin breyting verða á og við fengjum það staðfest að það ríkir sátt um þetta. Ef fólk myndi hins vegar streyma í aðrar áttir myndi RÚV kannski líta á það sem skilaboð frá markaðnum um að það þurfi að hegða sér meira í takt við vilja fólks og þá væri það líka góð niðurstaða,“ segir Snorri.