Jöfnuðu fjöl­býlis­hús við jörðu um miðja nótt

BBC hefur eftir fjölmiðlum í Líbanon að minnsta kosti fimm sprengjur hafi hæft átta hæða hús í Basa-hverfi Beirút í nótt, um klukkan fjögur að nóttu til. Svo virðist sem engar viðvaranir hafi verið gerðar, eins og Ísraelar hafa af og til gert í aðdraganda árása í borginni.

Fjölbýlishúsið var jafnað við jörðu og önnur nærliggjandi hús skemmdust verulega. Ekki liggur fyrir hvert skotmark árásarinnar var en fregnir hafa borist af því að mögulega hafi það verið meðlimur í stjórnarráði Hezbollah.

Ísraelar hafa fellt fjölmarga leiðtoga hryðjuverkasamtakanna á undanförnum mánuðum. Þar á meðal eru æðstu leiðtogar samtakanna og margir millistjórnendur.

Sjá einnig: Felldu tals­mann Hez­bollah í mið­borg Beirút

Samkvæmt Reuters er þetta í fjórða sinn í þessari viku sem Ísraelar varpa sprengjum á miðja Beirút en hingað til hafa árásir þeirra að mestu verið gerðar á sunnanverð úthverfi borgarinnar, þar sem ítök Hezbollah hafa verið mikil í gegnum tíðina.

Fréttamaður BBC birti meðfylgjandi myndband eftir árásina í nótt.

Eftir árás næturinnar gerðu Ísraelar einnig árásir í suðurhluta Beirút sem herinn segir að beinst hafi gegn stjórnstöð Hezbollah, vopnageymslu og öðrum skotmörkum. Í yfirlýsingu frá hernum segir að skotmörkin hafi verið meðal íbúðarhúsa en gripið hafi verið til aðgerða til að draga úr mannfalli meðal óbreyttra borgara. Þar á meðal hafi fólk verið varað við því að yfirgefa svæðið í aðdraganda árásanna.

Fréttamaður BBC á svæðinu sagði íbúa þriggja bygginga í suðurhluta Beirút hafa verið varaða við og þeim gert að yfirgefa hús sín.

Ísraelar og Hezbollah, sem njóta stuðnings klerkastjórnar Íran, hafa lengi eldað grátt silfur saman. Átökin þeirra á milli náðu nýjum hæðum þegar Hezbollah-liðar hófu eldflaugaárásir sínar á Ísrael þann 8. október, eftir að Ísraelar hófu árásir á Gasaströndina. Um sextíu þúsund Ísraelar hafa þurft að flýja heimili sín vegna þessara árása.

Ísraelar hafa gert umfangsmiklar og mannskæðar loftárásir í Líbanon og gerðu innrás í ríkið fyrr í haust, með því yfirlýsta markmiði að reka Hezbollah-liiða frá suðurhluta Líbanon.

Að minnsta kosti 3.500 manns liggja í valnum eftir árásir Ísraela í Líbanon, samkvæmt yfirvöldum þar, og rúm milljón manna hafa þurft að flýja heimili sín.