Úr­slit á lands­vísu: Þessi sitja á þingi næsta kjör­tíma­bil

Talningu í síðasta kjördæminu lauk ekki fyrr en eftir hádegi í dag. Þá var ljóst að Samfylkingin hefði hlotið flest atkvæði á landsvísu, 20,8 prósent, og bætt við sig níu þingmönnum frá síðasta kjörtímabili. 

Sjálfstæðisflokkurinn hlaut næstflest atkvæði eftir að hafa mælst þriðji og jafnvel fjórði stærsti flokkurinn í sumum skoðanakönnunum fyrir kosningar. Hann fékk á endanum 19,4 prósent atkvæða og fjórtán þingmenn. Það er tveimur færri en á síðasta kjörtímabili.

Hinir gömlu ríkisstjórnarflokkanir tveir, Vinstri græn og Framsókn, máttu þola niðurlægingu en þeir töpuðu átta þingmönnum hvor um sig. Vinstri græn þurrkuðust út af þingi en þrír af fjórum ráðherrum Framsóknarflokksins duttu út af þingi, þau Lilja Alfreðsdóttir, Ásmundur Einar Daðason og Willum Þór Þórsson. 

Sigurður Ingi Jóhansson, formaður Framsóknarflokksins, komst aðeins inn sem jöfnunarmaður eftir að lokaúrslit urðu ljós. Flokkurinn náði engum þingmanni inn á suðvesturhorni landsins, hvorki í Reykjavík suður eða norður né Suðvesturkjördæmi.

Saman töpuðu gömlu ríkisstjórnarflokkanir þannig átján þingsætum. Ríkisstjórnarsamstarf þeirra sprakk í október og boðaði Bjarni Benediktsson, formaður Sjálfstæðisflokksins, þá til kosninganna sem fóru fram í gær. Vinstri græn tóku ekki sæti í starfsstjórn.

Sögulegur árangur Flokks fólksins í Suðurkjördæmi

Viðreisn mældist gjarnan næst stærsti flokkurinn í skoðanakönnunum en þurfti að sætta sig við þriðja sætið í kosningunum með 15,8 prósent atkvæða. Hann hlaut ellefu þingsæti, sex sætum meira en í kosningunum 2021.

Flokkur fólksins var með 13,8 prósent á landsvísu og bætti við sig fjórum þingmönnum. Árangur hans í Suður- og Norðvesturkjördæmum var sögulegur. Í Suðurkjördæmi stóð Flokkur fólksins uppi með flest atkvæði, innan við tvö hundruð fleiri en Sjálfstæðisflokkurinn. Í Norðvesturkjördæmi var flokkurinn sá næst stærsti.

Miðflokkurinn náði ekki heldur upp í þær hæðir sem hann mældist stundunum í fyrir kosningarnar og hlaut á endanum 12,1 prósent atkvæða. Flokkurinn bætir við sig fimm þingmönnum.

Framsóknaflokkurinn var sjötti og síðasti flokkurinn sem náði sæti á þingi og fékk fimm menn, þar af tvo jöfnunarþingmenn.

Rúmlega árartugslangri þingsetu Pírata lokið í bili

Píratar voru eini stjórnarandstöðuflokkurinn sem tapaði þingsætum en þeir töpuðu stórt. Flokkurinn átti sex þingmenn á síðasta kjörtímabili en á engan á því næsta. Hann hafði átt sæti á þingi frá 2013.

Sósíalistaflokkurinn náði engum manni inn með sín fjögur prósent atkvæðanna. Það er sami skerfur atkvæða og flokkurinn fékk fyrir þremur árum.

Lýðræðisflokkur Arnars Þórs Jónssonar, fyrrverandi dómara og forsetaframbjóðanda, hlaut eitt prósent atkvæða, rúmlega 2.200 atkvæði. Ábyrg framtíð, sem bauð aðeins fram í einu kjördæmi, fékk 42 atkvæði.

Fréttin hefur verið uppfærð. Upphaflega stóð að tveir ráðherrar Framsóknar hefðu fallið af þingi en Willum Þór Þórsson varð sá þriðji þegar hann datt út sem jöfnunarþingmaður Suðvesturkjördæmis í lokatölunum.