Niðurröðun styrkleikaflokkanna hefur nú verið birt en alls munu sextán Evrópulönd tryggja sér sæti á HM sem mun fara fram í Bandaríkjunum, Kanada og Mexíkó á næsta ári.
Dregið verður í tólf fjögurra og fimm liða riðla í Zurich föstudaginn 13.desember næstkomandi en keppni í fimm liða riðlunum mun hefjast í mars á næsta ári en þegar kemur að fjögurra liða riðlunum mun keppni hefjast í september. Undankeppninni lýkur svo í nóvember á næsta ári.
Ljóst er að Ísland mun leika í fjögurra liða riðli þar sem að liðið mun leika umspilsleiki við Kósovó um sæti í B-deild Þjóðadeildarinnar í mars þegar að keppni í fimm liða riðlunum á að hefjast.
Hvað dráttinn fyrir undankeppni HM varðar mun Ísland því dragast í riðil með einu liði úr styrkleikaflokki eitt, tvö og fjögur.
Styrkleikaflokkarnir fyrir undankeppnina eru eftirfarandi:
-
Styrkleikaflokkur 1: Frakkland, Spánn, England, Portúgal, Holland, Belgía, Ítalía, Þýskaland, Króatía, Sviss, Danmörk og Austurríki
-
Styrkleikaflokkur 2: Úkraína, Svíþjóð, Tyrkland, Wales, Ungverjaland, Serbía, Pólland, Rúmenía, Grikkland, Slóvakía, Tékkland og Noregur
-
Styrkleikaflokkur 3: Skotland, Slóvenía, Írland, Albanía, N-Makedónía, Georgía, Finnland, Ísland, N-Írland, Svartfjallaland, Bosnía og Herzegóvína og Ísrael
-
Styrkleikaflokkur 4: Búlgaría, Lúxemborg, Belarús, Kósovó, Armenía, Kasakstan, Azerbaíjan, Eistland, Kýpur, Færeyjar, Lettland og Litháen
- Styrkleikaflokkur 5: Moldóva, Malta, Andorra, Gíbraltar, Liechtenstein og San Marínó
Þau tólf lið sem að bera sigur úr býtum í sínum riðli í undankeppninni tryggja sér beint sæti á HM. Þeir fjórir farmiðar sem þá eftir sitja verða ákvarðaðir með umspili þeirra tólf liða sem enda í öðru sæti riðlanna auk þeirra fjögurra liða sem ná besta árangrinum í yfirstandandi keppni Þjóðadeildarinnar og ná ekki að tryggja sér sæti á HM í gegnum undankeppnina. Umspilið mun fara fram í mars árið 2026.
Óvíst er á þessari stundu hver muni stýra íslenska landsliðinu í komandi undankeppni. Þjálfaraleit KSÍ stendur nú yfir eftir að Norðmaðurinn Age Hareide sagði starfi sínu lausu í síðustu viku.
