„Spurning um að fara að sækja réttu kokteilboðin“

Þetta segir Þorgrímur Þráinsson rithöfundur með meiru um úthlutun listamannalauna þetta árið. Formleg úthlutun menningarráðuneytis og Rannís verður kynnt á fimmtudag, en þeir listamenn sem sóttu um hafa fengið bréf og margir tjáð sig um úthlutunina. 

Þeirra meðal eru svekktir listamenn á borð við Elísabetu Jökulsdóttur, Guðrún Arndís Tryggvadóttir og Halldór Armand. Sá síðastnefndi lýsti launakerfinu sem útsettu fyrir klíkuskap, þó hann hafi verið tregur til að kvarta yfir því, enda þegið laun úr sjóðnum í fleiri ár. 

Fyrrnefndur Þorgrímur hefur á hinn bóginn aldrei fengið úthlutað úr sjóðnum fé til skrifta. Hann skrifar pistil á Facebook þar sem hann þakkar þeim listamönnum sem auðga andann. 

„Guði sé lof fyrir fólkið sem helgar sig listsköpun. Björk Guðmundsdóttir söngkona sagði á sínum tíma að ,,tónlist væri allsberar tilfinningar“. Ég tengi við það þegar ég spila mín eftirlætislög og felli tár. Sálin öðlast vængi,“ skrifar Þorgrímur. 

Réttu kokteilboðin

Hann vilji sífellt njóta meiri listar.

„Sjálfur hef ég skrifað 44 bækur á 35 árum, oftast barna- og ungmennabækur. Ekki veitir af í ljósi þess sem blasir við okkur. Mér hefur verið hafnað sem rithöfundi, af stjórn listamannalauna, í 33 ár þrátt fyrir að hafa 9 sinnum hlotið bókmenntaverðlaun. Og notið vinsælda. Höfnunin er mér hvatning, enda er ég keppnismaður. Enginn brotsjór,“ segir Þorgrímur sem fagnar þeim sem fá laun. 

„Og vonandi halda þeir áfram að skrifa - sem var líka hafnað. Kannski spurning um að fara að sækja réttu kokteilboðin.

Kærar þakkir, þið dásamlegu listamenn, sem látið ekki deigan síga, gefist ekki upp og haldið áfram að auðga anda okkar allra. Við eigum að lifa lífinu í lit, hafa hugrekki til að fylgja ástríðunni, þótt á móti blási og gera góðverk, eins oft og við getum. Áfram listamenn!“

Töluverðar breytingar virðast vera á úthlutun launa í ár en á meðal þeirra sem ekki hljóta náð fyrir augum nefndarinnar eru vel metnir og margverðlaunaðir rithöfundar á borð við Dag Hjartarson og Jónas Reynir Gunnarsson. Þá vakti það mikla athygli vakti þegar Elísabet Jökulsdóttir greindi frá því að hún hafi í fyrsta skipti í tuttugu ár ekki hlotið starfslaun, en þessi starfslaun skipta listamenn öllu máli.