Erlent

For­seti Brasilíu á gjör­gæslu eftir heilaað­gerð

Kjartan Kjartansson skrifar
Lula da Silva, forseti Brasilíu, glímir enn við afleiðingar þess að hann féll heima hjá sér í október.
Lula da Silva, forseti Brasilíu, glímir enn við afleiðingar þess að hann féll heima hjá sér í október. AP/Andre Penner

Luis Inacio Lula da Silva, forseti Brasilíu, er nú undir eftirliti lækna á gjörgæslu eftir að hann gekkst undir aðgerð á heila í São Paulo í gær. Forsetanum er sagt heilsast vel og aðgerðin hafa gengið vel.

Læknar sendu Lula í segulómskoðun eftir að hann kveinkaði sér undan höfuðverk í gær. Þá kom í ljós innvortis blæðing í höfðinu á forsetanum sem var fluttur um þúsund kílómetra leið frá höfuðborginni Brasilíu á skurðstofu á Sirio Libanes-sjúkrahúsinu í São Paulo, að sögn Reuters-fréttastofunnar. Þar gekkst Lula undir hnífinn til þess að veita burt blóði úr heila hans.

Lula, sem er 79 ára gamall, hlaut höfuðáverka og litla blæðingu á heila þegar hann féll heima hjá sér undir lok október. Hann hefur þurft að aflýsa ferðalögum vegna þess, meðal annars á ráðstefnu svonefndra BRICS-ríkja í Kazan í Rússlandi.

Forsetaembættið hefur ekki tjáð sig um veikindi Lula en forsvarsmenn Sirio Libanes-sjúkrahússins hafa boðað fréttamannafund síðar í dag.

Lula sór embættiseið sem forseti Brasilíu í þriðja sinn í janúar í fyrra eftir að hann bar sigurorð af Jair Bolsonaro, þáverandi forseta. Hann var áður forseti frá 2003 til 2011.

Brasilía Eldri borgarar

Mest lesið


Fleiri fréttir

Sjá meira


×

Mest lesið