„Get skilið að þetta komi mörgum spánskt fyrir sjónir“

Viggó hefur verið keyptur frá Leipzig, sem er um miðja deild í Þýska­landi, til fall­baráttuliðs Erlangen. Ís­lendingurinn hefur verið lykilmaður hjá Leipzig síðan árið 2022, raðað inn mörkum og komu þessi félags­skipti mörgum spánskt fyrir sjónir.

„Út á við lítur þetta kannski skringi­lega út. Í fyrsta lagi er þetta lið sem að á ekki að vera svona neðar­lega í töflunni. Þetta er lið sem á að vera miklu ofar. Þeir komu bara með til­boð til Leipzig í byrjun desember, forráða­menn liðanna ræddu sín á milli og komust að sam­komu­lagi. Í fram­haldinu næ ég síðan að semja við Erlangen. Þeir eru í erfiðri stöðu og urðu að gera eitt­hvað. Þeir gerðu mikið til þess að ná mér. Ég get skilið að þetta komi mörgum spánskt fyrir sjónir en mér finnst þetta spennandi og hlakka til.“

Viggó fær betri samning hjá Erlangen

„Enda væri maður ekki að fara til liðs sem á pappír er verra lið og rífa fjöl­skylduna upp með sér með flutningum og öllu sem því fylgir nema þetta passaði allt saman. Launa­kröfur er einn hluti af því.“

Svæsin flensa kom hins vegar í veg fyrir að Viggó gæti kvatt Leipzig al­menni­lega. Ekki er vitað hvað var að hrjá skyttuna en hann er allur að koma til.

„Það var leiðin­legt að fá ekki að kveðja liðs­félagana og áhorf­endur. Slútta þessu al­menni­lega. En það er ekki hægt að breyta því, svekkjandi en ég kem þarna ein­hvern tímann aftur og hirði tvö stig af þeim, kveð þá þannig.“