Reyndi að fá bólu­efni gegn Covid úr um­ferð á versta tíma

Ekki er búið að ákveða hvenær þingmenn tveggja nefnda í öldungadeildinni fá tækifæri til að spyrja Kennedy spurninga sinna en Washington Post segir starfsmenn Siðferðisskrifstofu enn vera að fara yfir fjármálaupplýsingar hans. Að því loknu mun hann verða kallaður fyrir fjármala- og heilbrigðismálanefndir öldungadeildarinnar.

Þessar tafir munu mögulega leiða til þess að Kennedy verður einn af þeim sem Trump hefur tilnefnt til embætta í ríkisstjórn sinni til að standa frammi fyrir þingmönnum og yrði því aukin athygli á hans umdeildu tilnefningu.

Sjá einnig: Kennedy yngri losaði sig við bjarnarhúnshræ í Central Park

Kennedy stendur frammi fyrir mikilli gagnrýni úr mörgum áttum. Allt frá hörðum íhaldsmönnum til frjálslyndra aðila, sem segja samsæriskenningar hans og rangfærslur um bóluefni og önnur málefni eiga að útiloka hann frá því að stýra heilbrigðismálastofnunum Bandaríkjanna.

Hann hefur meðal annars haldið því ranglega fram að bóluefni við kíghósta hafi dregið fleiri til dauða en það hafi bjargað. Kíghósti dró fjölda barna til dauða á árum áður en með bóluefnum hefur sjúkdómnum verið svo gott sem útrýmt á heimsvísu.

Einn lögmanna Kennedys, sem hefur verið að hjálpa honum að velja væntanlega undirmenn sína í heilbrigðisráðuneytinu, hefur reynt að fá Lyfjaeftirlit Bandaríkjanna til að taka bóluefni gegn kíhósta úr umferð. Það reyndi hann síðast árið 2022.

Sendi honum 175 spurningar

Elizabeth Warren, þingkona Demókrataflokksins, sendi Kennedy bréf á fimmtudaginn þar sem hún spurði hann út í fjármögnun hans á samtökum sem berjast gegn bóluefnum og nýleg ummæli hans varðandi það að draga úr aðgengi að aðgerðum til þungunarrofs og að segja upp opinberum starfsmönnum.

Í heildina sendi hún honum 175 spurningar. Ein þeirra snýr samkvæmt Washington Post að ummælum hans um að Covid gæti hafa verið hannað af mönnum til að hlífa gyðingum og Kínverjum.

Warren lagði til að Kennedy skoðaði þessar spurningar og mætti tilbúinn til að svar þeim.

Voru þegar talin hafa bjargað þúsundum

Covid-bóluefnin voru á þeim tíma sem Kennedy krafðist að þau yrðu tekin úr umferð, mjög eftirsótt og var byrjaði að opna skóla á nýjan leik. Á þessum tíma var samkvæmt New York Times áætlað að bóluefnin hefðu þegar bjargað um 140 þúsund lífum.

Nokkrum mánuðum áður hafði Trump kallað bóluefnin „kraftaverk“.

Í lok árs 2021 hélt Kennedy því fram við þingmenn í Louisiana að bóluefnið gegn Covid væri það „banvænasta í sögunni“.

Í upphafi síðasta árs var áætlað að bóluefnin gegn Covid og aðrar sóttvarnaraðgerðir hefðu bjargað um átta hundrað þúsund lífum í Bandaríkjunum.

Í kröfu Kennedys hélt hann því fram að meint hætta af bóluefnum væri svo mikil að notkun þeirra borgaði sig ekki. Vísaði hann til annarra lyfja eins og ivermectin og hydroxychloroquine, sem höfðu þá þegar verið metin áhrifalítil gegn veirunni.

Kröfunni var fljótt hafnað og vakti hún litla athygli á þeim tíma. Umsvif og áhrif Kennedys hafa aukist töluvert síðan þá.

Þegar hann var spurður út í viðhorf sitt til bóluefna í nóvember og hvort hann hefði reynt að koma í veg fyrir notkun þeirra sagði Kennedy að svo væri ekki. Hann sagðist hafa áhyggjur af því að bóluefnin hefðu ekki komið í veg fyrir dreifingu veirunnar og hélt því fram að enginn hefði verið að skoða það almennilega.

Formaður ósammála um bóluefnin

Hann og bandamenn hans hafa reynt að teikna upp þá mynd af Kennedy að hann sé ekki mótfallinn bóluefnum. Árið 2023 sagði hann þingmönnum að hann hefði fengið öll bóluefni sem mælt væri með, að bóluefninu gegn Covid undanskildu.

Sem heilbrigðisráðherra myndi Kennedy meðal annars hafa stjórn á rúmum átta milljörðum dala sem varið er til þróunar bóluefna og bólusetningar barna. Hann gæti einnig skipað fólk í áhrifamikla nefnd sem veitir ríkjum ráðleggingar varðandi bóluefni.

Í frétt NPR um tilnefningu Kennedys er rifjað upp hvernig hann dreifði röngum upplýsingum um bóluefni gegn mislingum á Samóaeyjum. Er vísað til ummæla Bill Cassidy, þingmanns Repúblikanaflokksins sem er einnig læknir, en hann sagði í nóvember í fyrra að hann væri það gamall að hann myndi eftir því hvernig skólum var lokað um löng skeið vegna mislinga.

Cassidy, sem stýrir heilbrigðismálanefnd öldungadeildarinnar, segist sammála nokkrum af yfirlýstum markmiðum Kennedys, eins og að draga úr neyslu mikið unna matvæla í Bandaríkjunum en segist ósammála honum um bóluefni.

„Eldri læknar sögðu mér að þegar bóluefnin gegn mislingum litu dagsins ljós var heilu deildunum lokað á sjúkrahúsum, því fólk var ekki lengur að missa sjónina eða verða heyrnarlaust vegna hettusóttar eða mislinga,“ sagði Cassidy í nóvember.

Mest er mótspyrnan gegn tilnefningu Kennedy þó úr röðum Demókrata. Ekki er ljóst hvort hún muni duga til, þar sem Repúblikanar eru í meirihluta í öldungadeildinni. Nokkrir þingmenn hafa gefið til kynna að þeir séu á báðum áttum þegar kemur að tilnefningunni en Repúblikana hafa hingað til ekki sýnt fram á mikinn vilja til að standa í hárinu á Trump, sem er með tangarhald á kjósendum flokksins.

Nýleg könnun sýndi að heilt yfir eru um þrjátíu prósent Bandaríkjamanna hlynntir tilnefningu Kennedys. Um 42 prósent eru andvíg henni og hinir segjast óákveðnir. Sé litið til þess hvar svarendur sitja á hinu pólitíska rófi segjast 59 prósent kjósenda Repúblikanaflokksins hlynnt tilnefningunni en einungis tíu prósent kjósenda Demókrataflokksins.