Grjóthörð Díana spilaði ristarbrotin

Díana og stöllur hennar unnu afar torsóttan en góðan sigur gegn Mosonmagyaróvár í Ungverjalandi á sunnudaginn, 34-32.

Díana meiddist undir lok fyrri hálfleiks og fékk aðhlynningu sjúkraþjálfara, en tókst einhvern veginn að harka af sér og spila seinni hálfleikinn. Hún skoraði þá til að mynda tvö mörk í röð til að koma HSG yfir um miðjan seinni hálfleikinn.

Læknisskoðun eftir leik leiddi í ljós að ristarbein (e. metatarsal) hefði brotnað og því missir Díana af næstu leikjum HSG.

„Þetta eru sorgartíðindi fyrir hana, okkur sem lið og félag, því hún hefur þróast í lykilleikmann á síðustu mánuðum og vikum,“ segir Steffen Birkner, þjálfari HSG, við heimasíðu félagsins.

„Ég er mjög sorgmædd yfir því að geta ekki hjálpað liðinu á vellinum í næstu leikjum. En ég mun gera allt til þess að verða klár í slaginn eins fljótt og hægt er,“ segir Díana.

Í samtali við handbolti.is segir Díana að mögulega þurfi hún að gangast undir aðgerð. Ákvörðun um það verði tekin í næstu viku en brotið „liggi ekkert allt of vel“.