„Fokking aumingjar“

„Ég var náttúrulega bara að drulla yfir nokkrar stelpur. Tala um hvað þetta væri karakterslaust og bara lítið að gerast þar. Við töpuðum þessu bara á karakter sko, við eigum alveg að geta hangið í þeim. Það verður samt að gefa Þór kredit, þetta er sennilega best spilandi lið í deildinni. Við fengum smá kennslustund og ég vona að mínar stelpur hafi lært eitthvað.“

Sagði Brynjar, aðspurður hvað hann hafði sagt inni í klefa eftir leik.

„Lúseramarkmið“

Öflugur varnarleikur hefur verið helsta einkenni Aþenu. Brynjar sagði eftir síðasta leik gegn Val að vörnin hafi staðið vel en sóknin ekki skilað sínu.

Fannst þér vörnin standa jafn vel í dag?

„Nei og það er svolítið leiðinlegt að ég setti mér markmið að ná þessu niður í tíu stig [Aþena var þrjátíu stigum undir eftir þriðja leikhluta], sem við gerðum, en þetta var svona lúseramarkmið.

Þrjátíu stigum undir og þá var það bara: Hey, reynum að saxa þetta niður, æfa okkur í að koma til baka og eitthvað, en nú er ég svolítið að pæla í því hvort Þór, hvort þær hafi bara verið hættar líka. Það er ekki alveg að marka þetta.

Þannig að það er ekki alveg að marka þessa tvo leiki. Myndatökumaðurinn þinn sagði að við hefðum unnið Val ef við hefðum spilað svona í síðasta leik, en við bara virðumst alltaf finna leiðir til þess að vera fokking aumingjar sko.“

Eðlislægur aumingjaskapur

Þið finnið leiðir til þess segirðu, er það þá bara eitthvað eðlislægt hjá þínum konum eða?

„Já það virðist vera. Það er eitthvað sem er erfitt að taka með á koddann. Ég meina, í alvöru, við eigum að vera búin að taka eitthvað af þessum leikjum sko. Í alvöru, það hlýtur að vera hægt að klára eitthvað af þessu bara á karakter, en það er bara þannig.“

Karakter(sleysi) ástæðan fyrir öllu

Er það bara karakterinn, ekkert annað í spilamennsku eða leikskipulagi?

„Karakter er náttúrulega vélin á bak við þetta. Það er karakter að mæta á æfingu, með allan listann af öllu feedback­-inu (ábendingum þjálfara) og vera að vinna í þessu. Ef þú ert með lélega vítanýtingu, þá ertu inni í íþróttahúsinu þar til ljósin slökkna, biður svo um lykilinn og ert bara nóttina að skjóta víti þar til þú ert kominn upp í einhverjar almennilegar tölur.

Þetta er bara það. Auðvitað töpum við á leikfræði, þannig er körfubolti… En þetta er fokking lélegt, það er það sem þetta er, ég er ekki sáttur.“

„Hippamussukomment“

Brynjar baðst svo afsökunar á því að blóta oft í viðtalinu, hann væri bara svo vanur því að nota slíkt orðalag í leikjum.

Sem er sannarlega rétt og vakti spurningu um hvort hann hafi prófað að beita einhverjum öðrum aðferðum en blótsyrðum og öskrum.

„Hvaða hippamussukomment er þetta? Get a life. Þetta eru bara alvöru stelpur hérna, myndirðu spyrja einhvern að þessu í karlaboltanum?“

Já var svarið við þeirri spurningu.

„Þú ert pottþétt nýr í þessu, þetta er svona í strákaboltanum sko,“ sagði Brynjar að lokum en krafðist frekari útskýringa á síðustu spurningunni eftir að slökkt hafði verið á upptökutækjum.

Því var svarað á þann veg að það væri ekki óeðlilegt að spyrja þjálfara hvort hann hyggist breyta sinni nálgun. Þá sérstaklega í ljósi þess að liðið er í neðsta sæti deildarinnar og hefur tapað átta leikjum í röð. Við tóku alllangar umræður sem verða ekki reifaðar frekar.

Fréttin hefur verið uppfærð

Orðinu leikflæði var breytt í leikfræði.