Verk­föllum kennara af­lýst sam­þykki deilu­aðilar til­lögu ríkis­sátta­semjara á laugar­dag

Ríkissáttasemjari fór yfir innanhústillöguna í Pallborðinu með Heimi Má Péturssyni fréttamanni síðdegis í dag. Í lögum væri gert ráð fyrir að sáttasemjari megi leggja fram miðlunartillögu sem gangi svo beint til atkvæða hjá deiluaðilum. Samninganefndir taki þannig ekki afstöðu til slíkrar tillögu heldur félagsfólk.

„Þessi tillaga er ekki þannig tillaga,“ segir Ástráður.  Ástæðan fyrir því að hann leggi fram innanhústillögu sem í raun væri tillaga að kjarasamningi væri að það væru efnisleg atriði í tillögunni sem ættu ekki heima í miðlunartillögu.

Nú þurfi samninganefndir deiluaðila að meta tillöguna fram á hádegi á laugardag. Verði hún samþykkt verði hún að kjarasamningi sem félagsmenn greiði síðan atkvæði um.

Ástráður segir að í tillögunni sé gert ráð fyrir að launahækkanir gangi fram eftir merki markaðarins, í samræmi við það sem hefur verið samið um hjá öðrum bæði á almenna og opinbera markaðnum.

Deiluaðilar hafi deilt um samning frá 2016 um jöfnun kjara kennara við laun á almenna markaðnum allt frá því lífeyriskjör voru samræmd milli markaða árið 2016 án mikils árangurs.  Deilan hafi haldið áfram fram eftir hausti í fyrra án þess að nokkur merki væru um að umræðan væri að þroskast.

Ástráður segir hins vegar að ákveðið skref hafi verið stigið með tillögu hans í nóvember um að deiluaðilar tækju tvo mánuði í að ræða virðismatið og hvernig ætti að nálgast það. Á þeim tíma færi fram einhvers konar mat á virði starfa svo hægt væri að nálgast það markmið að jafna kjörin.

Gert ráð fyrir eingreiðslu

Ástráður segir að í tillögu hans sé þessi munur á milli markaða viðurkenndur og gert ráð fyrir að launagreiðandi fallist á að greiða inn á þessa vegferð. Það væri viðurkenning á viðfangsefninu.  Í meginatriðum væri verið að samþykkja að skipta um aðferðarfræði og reyna aðra leið til að jafna laun og kjör kennara við aðrar stéttir en hefur verið reynd frá árinu 2016. Í tillögunni felist eingreiðsla til kennara sem eigi að vera skref í þessa átt.

Ástráður vildi ekki fara út í tillöguna í smáatriðum í Pallborðinu. Það væri eðlileg kurteisi að samninganefndir fengju færi á að kynna samninginn fyrir sínu fólki. Einnig fælist í tillögunni að samningsðilar gætu sagt samningnum upp ef þessi aðferð væri ekki að virka eða ef breytingar yrðu á vinnumarkaði almennt.

„Ég finn að þetta mál er þungt í öllum herbúðum,“ segir Ástráður. Allir aðilar telji eitthvað ekki nægilega gott. Samningurinn gæti aftur á móti verið leið út úr „þeim vítahring“ sem þau eru komin í," sagði ríkissáttasemjari.

Friðarskylda samþykki þau tillöguna

Ástráður segir til mikils að vinna að ná samningi og afstýra þannig verkfallsaðgerðum. Erfitt væri að halda uppi jákvæðum samræðum þegar fólk væri komið í aðgerðaham. Samninganefndir hafa fram á klukkan 13:00 á laugardag til að taka afstöðu til tillögunnar.  Samþykki deiluaðilar tillöguna jafngildi það því að skrifa undir kjarasamning og þá væri komin á friðarskylda og verkföllum frestað. Deiluaðilar hafi eftir það um tvær vikur til að kynna samninginn og setja hann í atkvæðagreiðslu félagsmanna.

Ástráður segir ekki hægt að leysa kjaramál í eitt skipti fyrir öll en hann viti enga betri leið til að ná friði um grunnlaunasetningu kennara en aðferðina sem hann væri að leggja til. Ef þetta gangi vel geti aðferðin orðið fyrirmynd fyrir aðra að virðismati starfa.

Verði tillagan hins vegar ekki samþykkt segir Ástráður að þá verði haldið áfram að leita nýrra leiða. Verkföll væru lögmæt aðferð til að knýja fram betri kjör og hann ætli ekki að dæma þær aðferðir sem notaðar væru hverju sinni.