Espanyol, sem sat í fallsæti fyrir leik liðsins í kvöld, gerði sér lítið fyrir og vann 1-0 sigur gegn toppliði Real Madrid í spænsku úrvalsdeildinni í knattspyrnu í kvöld.
Madrídingar voru líklegri aðili leiksins lengst af og Vinicius Junior kom boltanum í netið fyrir liðið um miðbik fyrri hálfleiks. Eftir stutta skoðun myndbandsdómara kom hins vegar í ljós að Kylian Mbappé var brotlegur í aðdraganda marksins og markið því dæmt af.
Þrátt fyrir ítrekaðar tilraunir Madrídinga tókst þeim ekki að koma boltanum í netið. Vinstri bakverðinum Carlos Romero tókst hins vegar að gera það sem gestunum tókst ekki þegar hann kom heimamönnum í Espanyol í forystu með marki á 85. mínútu.
Það reyndist að lokum eina mark leiksins og niðurstaðan varð óvæntur 1-0 sigur Espanyol. Með sigrinum lyfti liðið sér upp úr fallsæti og situr nú í 17. sæti með 23 stig eftir 22 leiki.
Real Madrid trónir hins vegar enn á toppnum með 49 stig, einu stigi meira en Barcelona sem situr í öðru sæti.
