Rafrettukóngur og Drekaeigandi sektaðir um 1,1 milljarð hvor

Dómur var kveðinn upp í Hérðasdómi Reykjaness á tólfta tímanum. Mbl greinir frá niðurstöðu dómsins.

Snorri, sem hagnast hefur ævintýralega á sölu hinna ýmsu nikótínvara á síðustu árum, var ákærður fyrir stórfelld tollalagabrot í félagi við Sverri og þriðja mann. Þeim var gefið að sök að hafa komist undan greiðslu 741 milljónar króna í tóbaksgjöld af innflutningi um einnar milljónar pakka af vindlingum.

Í ákæru á hendur mönnunum kom fram að Snorri væri ákærður ásamt Sverri Þór Gunnarssyni sem fyrirsvarsmenn félagsins Áfengi og tóbak ehf. Þriðji maðurinn sem þáverandi starfsmaður flutningafyrirtækisins Thor shipping ehf.. Sá var lykilvitni saksóknara í málinu en fékk sjálfur sex mánaða skilorðsbundinn fangelsisdóm í nóvember fyrir sinn þátt.

Það athugist að Sverrir Þór á alnafna sem almennt gengur undir nafninu Sveddi tönn.

Snorra og Sverri var gefið að sök að hafa framið stórfelld brot gegn tollalögum og lögum um gjald af áfengi og tóbaki, með því að hafa í sameiningu í níu tilvikum, á árunum 2015 til og með 2018, veitt íslenskum tollyfirvöldum rangar og villandi upplýsingar þegar Áfengi og tóbak ehf., flutti inn reyktóbak og vindlinga frá Grand River Enterprises GmbH, Þýskalandi, Overseas Distribution Company N.V., Belgíu og Mac Baren Tobacco Company A/S, Danmörku.

Þeir hefðu komið því til leiðar að starfsmaður hjá Thor Shipping ehf., sem sinnti tollskjalagerð í umboði félagsins, tilgreindi rangar vörutegundir á aðflutningsskýrslum fyrir tollafgreiðslu, það er annars vegar prótein og hins vegar pappírsvörur, í stað þess að reyktóbakið væri réttilega tilgreint sem önnur framleiðsla úr tóbaki o.fl. og vindlingarnir sem vindlingar.

Með framangreindum hætti hafi þeir komið því til leiðar að lögbundið tóbaksgjald upp á tæplega 741 milljón krónur var ekki lagt á innfluttar vörur félagsins.

Snorri hefur sem áður segir gert að gott undanfarin ár á sölu nikótínvara. Það hefur hann fyrst og fremst gert í gegnum félögin Fitjaborg og Pólóborg ehf.. Félögin reka söluturnana Póló, sem voru meðal þeirra fyrstu til að hefja sölu á rafrettum og nikótínpúðum hér á landi.

Pólóborg hagnaðist um 87 milljónir króna árið 2022 og 179 milljónir króna árið 2021.

Sömu ár hagnaðist Fitjaborg um 235 milljónir króna og 261 milljón króna. Ársreikningar félaganna fyrir árið 2023 liggja ekki fyrir.

Þá rataði Snorri í fréttir árið 2022 þegar hann keypti glæsilegt einbýlishús í Akrahverfinu í Garðabæ ásamt sambýliskonu sinni á litlar 220 milljónir króna. Sambýliskonan á helmingshlut í Fitjaborg á móti honum.

Sverrir Þór rekur söluturninn fornfræga Drekann á Njálsgötu í gegnum félag sitt Urriðafoss ehf.. Áfengi og tóbak er skráð til húsa í sama húsnæði og Drekinn. Urriðafoss var meðal eigenda Bankastrætis club þegar hann var og hét.

Saksóknari krafðist að allir ákærðu yrðu dæmdir til refsingar og greiðslu sakarkostnaðar. Þá voru upptökukröfur ákæruvaldsins kræfari en gengur og gerist.

Þess var meðal annars krafist að Snorri yrði dæmdur til að þola upptöku á helmingshlut hans í þremur eignum, lóð í Bláskógabyggð, húsnæði veitingastaðar í Stykkishólmi og ofangreindu einbýlishúsi í Garðabæ.

Þá krafðist ákæruvaldið þess að hann sætti upptöku um 133 milljóna króna af fimm reikningnum. Þar á meðal eru tólf milljónir króna sem sambýliskona hans millifærði inn á reikning Héraðssaksóknara gegn afhendingu á sjö úrum sem haldlögð voru af héraðssaksóknara við húsleit á heimili þeirra í Garðabæ.

Héraðssaksóknari krafðist þess sömuleiðis að Sverrir Þór yrði dæmdur til að sæta upptöku á einbýlishúsi í Urriðaholti í Garðabæ, atvinnuhúsnæði við Miklubraut í Reykjavík og um það bil 55 milljónum króna.

Af milljónunum 55 eru fjörutíu innistæða á reikningi sem lögmannsstofa lagði inn á reikning Héraðssaksóknara gegn afhendingu sautján Rolex-úra.

Loks var þess krafist að Áfengi og tóbaki ehf. yrði gert að sæta upptöku á 440.750 pökkum af vindlingum. Brotin tengdust innflutningi á um milljón pökkum af vindlingum.

Mbl greinir frá því að upptökukröfur saksóknara hafi verið samþykktar. Dómurinn var birtur síðdegis og má lesa hér.

Fréttin var uppfærð. Í fyrri útgáfu stóð að þeir hefðu verið dæmdir til að greiða samanlagt 1,1 milljarð króna.