Við­kvæðið enn að kennarar yngri barna eigi minna skilið

Í gær var hluti heimasíðu Sambands íslenskra sveitarfélaga í ólagi og var ekki hægt að nálgast fundagerðir stjórnar sambandsins en nú hafa þær að nýju verið birtar. Heiða Björg Hilmisdóttir, formaður SÍS, hefur látið hafa eftir sér að hún væri hlynnt tillögunni. Þess sér þó hvergi stað í fundargerðum Sambandsins þar sem fjallað er um afstöðu stjórnar. En klukkan þrjú í dag koma kennarar og viðsemjendur saman til fundar hjá ríkissáttasemjara og í morgun mættu hátt í sjötíu kennarar í Garðabæ í Sveinatungu á Garðatorgi þar sem fundur bæjarráðs fór fram. Ragnheiður Stephensen, kennari í Garðaskóla, var þar á meðal.

„Við vildum bara í kjölfar þessara atburða sem urðu síðasta föstudag ítreka óánægju okkar með stöðu mála.“

Almar Guðmundsson bæjarstjóri hafi tjáð henni að bæjarráð hefði ályktað um að brýnt væri að samningum yrði náð sem fyrst.

Óttast orðin tóm 

Ragnheiður segir að kennarar séu reynslunni ríkari eftir samkomulag frá 2016 og geti því ekki tekið loforðum sem gætu reynst orðin tóm. Virðismatsvegferðin sé enn á teikniborðinu en hún sé óútfærð sem skipti máli í þessu sambandi.

„Því ef þú viðurkennir ekki að það að vera með umsjón með risastórum hópi nemenda jafngildi að vera með mannaforráð á opinbera markaðnum þá kemur engin jöfnun fram. Það er nefnilega ennþá þetta viðhorf að eftir því sem þú kennir og vinnur með yngri börnum því minna áttu að fá launað. Sem foreldrar hljóta þeir að átta sig á því að þeir vilja hafa jafn hæfa einstaklinga til að hugsa um lítil börn, meðalstór börn og stór börn.“

Ragnheiður var spurð að því hvort hún hefði skilning á erfiðri stöðu sveitarfélaganna því þau eru missterk fjárhagslega.

„Ríkið verður að sjálfsögðu að stíga inn og endurskoða skiptingu kökunnar. en það er ekki eitthvað sem kennaraforystan getur verið að hafa áhyggjur af. Sveitarfélögin og ríkið verða að ráða fram úr því.“