„Hefur verið draumur minn síðan ég var lítill“

Ísak spilaði fyrsta landsleikinn úti í Grikklandi en í dag er komið að fyrsta leik hans í Laugardalshöllinni. Ísland mætir Grikklandi klukkan 16.00 í dag og tryggir sér sæti á Evrópumótinu með sigri. Það er uppselt á leikinn.

Geggjað að fá að spila með þeim

„Það var bara mjög gaman, að fá að vera með þessu liði, æfa með þeim og að vera á fundum með þeim. Það er síðan bara geggjað að fá að spila með þeim,“ sagði Ísak Steinsson aðspurður um fyrsta A-landsleikinn. Valur Páll Eiríksson hitti Ísak á æfingu og ræddi við hann.

Hann kom aðeins við sögu í stórsigrinum út í Grikklandi.

„Ég var mjög spenntur. Snorri sagði mér að ég væri að fara inn á og fara að spila með íslenska landsliðinu. Þetta var draumur að rætast,“ sagði Ísak.

„Ég hef verið með yngri landsliðunum í nokkur ár og þetta hefur verið draumur minn síðan ég var lítill,“ sagði Ísak en hvernig er að vera með þessum landsliðshópi Íslands.

Fylgst með þeim síðan ég var lítill

„Þetta er mjög spennandi. Ég hef fylgst með þeim síðan ég var lítill, var að fylgjast með bestu leikmönnunum i heimi í öllum stöðum. Það er líka stórt fyrir mig að fá að vera í marki með Bjögga [Björgvin Páll Gústavsson] sem er búinn að vera í þessu mjög lengi,“ sagði Ísak.

„Bjöggi kann allt og svo erum við með Roland [Eradze] sem markmannsþjálfara sem er mjög spennandi fyrir mig,“ sagði Ísak.

Hefur Ísak verið mikið á Íslandi í gegnum tíðina?

„Ég hef verið með yngri landsliðunum og kem því hingað á hverju sumri til að æfa með þeim áður en við förum út á mótin. Ég bjó líka í hálft ár á Íslandi þegar ég var tólf ára og þá spilaði ég í Val,“ sagði Ísak

Verður örugglega mjög skemmtilegt

„Ég þekki nú ekki marga hérna í hópnum en þeir eru búnir að taka vel á móti mér og þetta virkar vel,“ sagði Ísak og nú er fram undan leikur í Laugardalshöllinni.

„Ég er mjög spenntur. Strákarnir voru að tala um það að þeim þætti það alltaf mjög sérstakt að spila hér heima á Íslandi. Þetta verður því örugglega mjög skemmtilegt,“ sagði Ísak en það má sjá viðtalið hér fyrir neðan.