Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Íslandsmeistara Breiðabliks og Aftureldingar laugardaginn 5. apríl.
Íþróttadeild spáir ÍBV 12. sæti Bestu deildarinnar í sumar og að nýliðarnir stoppi stutt við í deildinni.
Eyjamönnum tókst ætlunarverkið, að komast beint upp í Bestu deildina eftir að hafa fallið úr henni haustið 2023. Það var kannski ekki mesti glansinn á því - ÍBV fékk bara 39 stig í mjög jafnri Lengjudeild - en markmiðið náðist og Vestmannaeyjar eiga aftur lið í efstu deild.
Hermann Hreiðarsson lét gott heita hjá ÍBV eftir að hafa komið liðinu upp og við starfi hans tók Þorlákur Árnason. Hann er þrautreyndur þjálfari sem hefur komið víða við á ferlinum. Þorlákur er að fara að þjálfa í efstu deild karla í fyrsta sinn í tuttugu ár, eða síðan hann stýrði Fylki til 5. sætis sumarið 2005.
Auk þjálfaraskiptanna hafa talsverðar breytingar orðið á leikmannahópi ÍBV í vetur. Heimastrákarnir Tómas Bent Magnússon og Guðjón Ernir Hrafnkelsson reru á önnur mið og Spánverjinn sterki, Vicente Valor, fór í KR. Eyjamenn héldu hins vegar Oliver Heiðarssyni, markahæsta leikmanni Lengjudeildarinnar á síðasta tímabili, og það gæti skipt sköpum.
Oliver hefur verið í mikilli sókn síðustu ár og blómstraði í fyrra þar sem hann skoraði fjórtán mörk. Næstmarkahæsti leikmaður Lengjudeildarinnar í fyrra, Omar Sowe, er einnig kominn í ÍBV og mikið mun mæða á þeim Oliver í sumar. Þeir hafa þó aðeins skorað samtals níu mörk í 78 leikjum í efstu deild á Íslandi. Þeir verða að gefa í á því sviði ef ÍBV ætlar að þrauka í deild þeirra bestu.
ÍBV hefur fengið þrjá aðra erlenda leikmenn; varnarmennina Jovan Mitrovic og Mattias Edeland og miðjumanninn Milan Tomic. Þeir þurfa að reynast góður liðsauki í þeirri hörðu baráttu sem framundan er hjá ÍBV.
Talsverð hringl hefur verið á markvarðastöðunni hjá ÍBV síðustu ár og þrír markverðir léku fyrir liðið í Lengjubikarnum. Hjörvar Daði Arnarsson stendur væntanlega milli stanganna í byrjun móts en spurningarmerkið við þessa gríðarlega mikilvægu stöðu er full stórt.
Þá er ekki hægt að líta framhjá því hversu mikið ÍBV missti í Guðjóni Erni og Tómasi Bent, sérstaklega þeim síðarnefnda. Þar eru farnir tveir kraftmiklir menn, Tómas auk þess heimamaður, sem voru liðinu mikilvægir.
Óvíst er hvort Eyjaliðið eins og það lítur út í dag sé sterkara en liðið sem vann Lengjudeildina á ekkert sérstaklega sannfærandi hátt í fyrra. Eyjamenn hefðu þurft að gefa í og bæta í hópinn sem virðist vera full veikur þegar nokkrir dagar í mót.
ÍBV hefur lengst af átt áskrift af sæti í efstu deild en veruleikinn í dag er annar. Eyjamenn féllu 2019 og 2023 og það er hætt við að deildaflakkið haldi áfram á næstunni.
