Facebook hættu að beina aug­lýsingum að konu eftir að hún lögsótti Meta

Einstaklingsmiðaðar auglýsingar (þýðing á enska hugtakinu „targeted advertisements“) eru algengar á samfélagsmiðlum. Persónuuppplýsingar notenda eru þá notaðar til að sérsníða auglýsingar handa hverjum og einum.

Hin 37 ára Tanya O'Connoll hafði betur gegn Meta en hún sagði við BBC að niðurstðan myndi opna „gátt“ fyrir annað fólk sem vill ekki að samfélagsmiðlafyrirtækið sýni þeim auglýsingar sem byggja á áhugamálum og félagsleg einkennum fólks.

Skoða að gera Facebook að áskriftarmiðli

Embætti upplýsingastjóra (e. The Information Commissioner's Office) sem sinnir gagnaeftirliti á Bretlandi hefur sagt einstaklingsmiðaðar auglýsingar á netinu falla undir beina markaðssetningu (e. direct marketing). Fólk hafi því fullan rétt til að mótmæla þeim.

Meta sagðist í yfirlýsingu taka almennu persónuverndarreglugerðina á Bretlandi alvarlega og bjóða upp á „öflugar stillingar og verkfæri fyrir notendur til að stjórna gögnum sínum og vali á auglýsingum.“ 

Þá sagði samfélagsmiðlarisinn einnig að bæði Facebook og Instagram væru ókeypis fyrir breska notendur vegna þessara persónulegu stillinga. Fyrirtækið væri að skoða að bjóða Bretum upp á áskriftarþjónustu frekar en að miðillinn væri ókeypis.

Ósanngjarnir skilmálar um ágengar auglýsingar

O'Carroll stofnaði Facebook-síðu sína fyrir tuttugu árum en lögsótti Meta árið 2022 vegna einstaklingsmiðuðu auglýsinga miðilsins og notkunar hans á persónuupplýsingum hennar.

Í viðtali við Radio 4 sagðist O'Carroll hafa verið meðvituð um að allir hefðu rétt á að andmæla þessari tegund af ágengri auglýsingastarfsemi.

„Ég held við ættum ekki að þurfa að samþykkja þessa ósanngjörnu skilmála þar sem við göngumst við allri þessari ágengu upplýsingarakningu og eftirlit,“ sagði hún.

Óléttan breytti sýn hennar

Hún hafi fyrst gert sér fyllilega grein fyrir hve markvissar auglýsingarnar voru þegar hún varð ólétt árið 2017. Á nokkrum vikum hafi auglýsingarnar tekið að breytast og leggja áherslu á barna-, móður- og uppeldistengda hluti.

„Mér fannst það taugatrekkjandi - þetta var áður en ég sagði fólki nákomnu mér en samt hafði Facebook þegar ákveðið að ég væri ólétt,“ sagði hún.

Almenna persónuverndarreglugerðin (e. General Data Protection Regulation) stýrir því hvernig fyrirtæki og stofnanir nota persónuupplýsingar. O'Carroll hélt því fram í lögsókn sinni að einstaklingsmiðuðu auglýsingar Facebook féllu undir beina markaðssetningu.

Meta hélt því fram að auglýsingar á miðlinum gætu einungis beinst að hópi hundrað einstaklinga að minnsta kosti fremur en stökum einstaklingi. Því teldist það ekki bein markaðssetning. Dómurinn gat þó ekki fallist á það og segist O'Carroll loksins hafa getað slökkt á einstaklingsmiðuðu auglýsingunum sínum.