Verstappen fagnaði sigri í Japan: „Þetta er ansi dýr sláttu­vél“

Verstappen hafði betur eftir hörkukeppni við McLaren mennina Lando Norris og Oscar Piastri sem báðir höfðu unnið eina keppni hvor fyrr á tímabilinu.

Sigurinn heimsmeistarans þýðir að nú er Verstappen aðeins einu stig á eftir Lando Norris í keppni ökumann eftir þrjár fyrstu keppnir tímabilsins.

Verstappen kann mjög vel við sig á Suzuka brautinni því hann hefur nú unnið þar fjögur ár í röð.

Verstappen hélt líka haus undir mikilli pressu. Hann tryggði sér ráspólinn með mögnuðum lokahring í tímatökunni og var síðan með Norris nartandi í hælana á honum alla keppnina.

McLaren óttaðist að það yrði erfitt að komast fram úr Verstappen og það varð líka raunin.

Það gekk þó mikið á í einu stoppinu þar sem þeir Verstappen og Norris komu inn með aðeins einnar og hálfrar sekúndu millibili. Aðstoðarmenn Norris voru sekúndu sneggri að klára bílinn og þá hófst hörð keppni að komast fyrr út.

Verstappen tókst að halda sinni línu og þetta endaði með að Norris keyrði sinn bíl út á gras.

Max Verstappen grínaðist með þetta eftir keppnina. „Þetta er ansi dýr sláttuvél,“ sagði Verstappen þegar hann horfði á atvikið með Norris.

Hollendingurinn var líka mjög kátur í bílnum rétt eftir að hann kom fyrstur í marki. „Við gefumst aldrei upp og gerum þetta saman. Ótrúlegt. Þvílík helgi fyrir okkur,“ sagði Verstappen.

„Þetta var erfitt en það var líka mjög gaman á brautinni. Ég er ótrúlega ánægður. Bílinn var í frábæru formi í dag og það að ná ráspólnum gerði þetta mögulegt. Þetta skiptir mig miklu og það er frábært að geta unnið fyrir Honda í Japan,“ sagði Verstappen.

Piastri varð þriðji og Ferrari maðurinn Charles Leclerc náði fjórða sætinu en var samt sextán sekúndum frá verðlaunapallinum. George Russell tók fimmta sætið og liðsfélagi hans hjá Mercedes, Andrea Kimi Antonelli, varð sjötti.

Lewis Hamilton hjá Ferrari var áttundi á ráspól en tókst að hækka sig upp um eitt sæti í það sjöunda.