Krakkarnir sem gætu fengið sénsinn hjá Amorim

Eftir frækinn sigur á Lyon í vikunni staðfesti Amorim að vegna þeirra meiðsla sem eru að hrjá fjöldann allan af leikmönnum aðalliðs félagsins myndu ungir og efnilegir leikmenn fá fleiri tækifæri. 

The Athletic hefur nú tekið saman hvaða leikmenn eru líklegastir til að fá mínútur í ensku úrvalsdeildinni á komandi vikum.

Hinn 17 ára gamli Chido Obi-Martin mun að öllum líkindum deila mínútum með samlanda sínum Rasmus Höjlund í fremstu víglínu. Obi-Martin er ekki skráður í Evrópudeildarhóp liðsins og þar sem Danirnir tveir eru einu leikfæru framherjar liðsins sem stendur munu þeir eflaust spila slatta.

Harry Amass mun eflaust fá fleiri tækifæri en þessi 18 ára gutti kom inn fyrir Patrick Dorgu í stöðu vinstri vængbakvarðar í leiknum gegn Lyon í vikunni.

Hinn 19 ára gamli Jack Moorhouse er annar sem gæti fengið tækifæri á komandi vikum. Um er að ræða miðjumann með góða boltatækni. Godwill Kukonki er 17 ára varnarmaður sem gæti fengið sénsinn en ekki heillaði Luke Shaw í sínum fyrsta leik í langan tíma í miðri viku.

Hinn 18 ára gamli Jaydan Kamason gæti leyst Diogo Dalot af en Portúgalinn hefur spilað flestar mínútur allra í liði Man United á leiktíðinni. Hann má ekki við að spila þreyttur þar sem það verður seint sagt að hann sé vel á verði varnarlega.

Man United tekur á móti Úlfunum síðar í dag en gestirnir hafa unnið síðustu fjóra leiki sína í deildinni. Sigur lyftir Rauðu djöflunum upp í 13. sæti og yfir 40 stiga múrinn fræga sem sagður er vera sá stigafjöldi sem þarf til að halda sæti sínu í deildinni.