Real Madrid pressar á Barcelona en Orri og fé­lagar í vand­ræðum

Güler fékk tækifæri í byrjunarliði Real Madrid í kvöld og nýtti það vel. Á 21. mínútu kom hann Spánar- og Evrópumeisturunum yfir með skoti fyrir utan vítateig.

Það mark dugði Real Madrid og liðið vann sinn þriðja 1-0 sigur í röð. Real Madrid er í 2. sæti deildarinnar með 72 stig, fjórum stigum á eftir toppliði Barcelona. Bæði lið eiga fimm leiki eftir en þau eiga eftir að mætast innbyrðis 11. maí.

Orri kom inn á sem varamaður á 66. mínútu þegar Real Sociedad beið lægri hlut fyrir Alavés á útivelli, 1-0.

Real Sociedad hefur aðeins fengið eitt stig í síðustu þremur leikjum og er í 9. sæti deildarinnar.

Orri hefur komið við sögu í 22 deildarleikjum á tímabilinu og skorað þrjú mörk. Hann var síðast í byrjunarliði Real Sociedad fyrir rúmum mánuði.